भरत मोहळकर, साम प्रतिनिधी

विधानसभा निवडणुक तोंडावर आली असतानाच आता महायुतीतील खदखद समोर येण्यास सुरुवात झालीय. कारण अजित पवारांच्या पुणे जिल्ह्यातच त्यांच्या पक्षाचे आमदार आणि भाजप नेत्यांमधील वाद टोकाला गेले आहेत. अजितदादा गटाचे आमदार अण्णा बनसोडेंच्या पिंपरी मतदारसंघावर भाजपनं दावा ठोकलाय.

विशेष म्हणजे अजित पवारांच्या राष्ट्रवादीविरोधात भाजपच्या आमदार उमा खापरेंनी ठरावच केलाय. त्यामुळे आता भाजपच्या मतदारसंघांवरही दावा सांगणार असल्याचा इशारा अण्णा बनसोडेंनी दिलाय. त्यामुळे पिंपरीत महायुतीतला वाद चव्हाट्यावर आलाय.

पिंपरीतली ही धुसफूस कमी आहे की काय तिकडे मावळमध्ये महायुतीत रण पेटलंय. भाजप पदाधिकारी अजित पवारांनी शेतकऱ्यांवर गोळीबार केल्याचा अपप्रचार करत असल्याचा आरोप दादांचे आमदार सुनील शेळकेंनी केलाय. त्यामुळे विधानसभेला मावळमधील भाजपचे पदाधिकारी तुतारीचा प्रचार करणार असल्याचा खळबळजनक आरोप सुनील शेळकेंनी केलाय. तर महायुतीच्या उच्चस्तरीय बैठकीत विसंवाद टाळण्याविषयी बोलणार असल्याचं तटकरेंनी म्हटलंय.

लोकसभा निवडणुकीनंतर भाजप पदाधिकाऱ्यांनी अजित पवारांच्या विरोधात उघड भूमिका घ्यायला सुरुवात केली. भाजपचे राष्ट्रीय अध्यक्ष जे पी नड्डा यांनी महायुतीत वाद होऊ देऊ नका अशा सूचना केल्या होत्या. मात्र त्यानंतरही अनेक मतदारसंघामध्ये अजित पवारांची राष्ट्रवादी आणि भाजपमधले वाद चव्हाट्यावर येत आहेत. अमित शाहांच्या दौ-यात यावर तोडगा काढण्याचं आव्हान आहे. त्यामुळे हे वाद शमवण्यात महायुतीला यश येणार की याची विधानसभा निवडणुकीत किंमत मोजावी लागणार याकडे लक्ष लागलंय.