Vidarbha Travels Bus Accident Updates: ३० जून २०२३ रोजी नागपूरवरून पुण्याच्या दिशेने प्रवास करणाऱ्या विदर्भ ट्रॅव्हल्स या खाजगी बसचा बुलढाण्यातील सिंदखेडराजा शिवारात भीषण अपघात झाला. या अपघातात २६ प्रवाशांचा होरपळून मृत्यू झाला. तर ७ प्रवाशी जखमी झाले.

पोलिसांनी (Police) आता या दुर्घटनेची चौकशी सुरू केली असून एक अहवाल समोर आला आहे. समृद्धी महामार्गावरील विदर्भ ट्रॅव्हल्सचा अपघात हा चालकाच्या चुकीमुळे घडल्याचं समोर आलं आहे. अपघातावेळी बस चालक शेख दानिश याने मद्यप्राशन केल्याची शक्यता वर्तवण्यात आली आहे.

दानिश याच्या शरीरात मद्याचे प्रमाण मर्यादेपेक्षा ३० टक्के जास्त होते असं अहवालात नमूद करण्यात आलं आहे. एबीपी माझाने याबाबतच वृत्त दिलं आहे. एबीपीने दिलेल्या वृत्तानुसार, अमरावती (Amravati) येथील रीजनल फॉरेंसिक सायन्स लँबोरिटिने यासंदर्भातला फॉरेन्सिक तपास केला आहे.

त्यांच्या अहवालामध्ये बसचालक शेख दानिश याच्या शरीरात अपघाताच्या दिवशी मद्याचे प्रमाण मर्यादेपेक्षा ३० टक्के जास्त होते, असे अहवालात नमूद करण्यात आल्याची माहिती आहे.

त्यामुळे समृद्धी महामार्गावर (Samruddhi Mahamarg Accident) विदर्भ ट्रॅव्हल्सचा अपघात चालकाने मद्यपान केल्याने घडला का? असा प्रश्न उपस्थित होत आहे. विशेष बाब म्हणजे बसचा अपघात हा टायर फुटल्याने झाला असा दावा बसचालक शेख दानिश याने केला होता.

मात्र, एका खासगी फॉरेन्सिक संस्थेने टायर फुटल्याने हा अपघात झाला नसल्याचा खुलासा केला होता. दरम्यान, आता विदर्भ ट्रॅव्हल्सच्या अपघातासंबंधी वेगवेगळे अहवाल समोर येत असून हा अपघात मानवी चूक आणि बेजबाबदारपणाने गाडी चालवण्याने घडला असावा, असेच तपशील आता समोर येत आहे.

अपघातानंतर पोलिसांनी बसचालक दानिश शेख याला अटक करून ताब्यात घेतलं असून त्याच्यावर आयपीसीचे कलम ३०४ आणि मोटार वाहन कायद्याचे कलम १३४,१८४ आणि २७९ लावण्यात आले आहेत.

Edited by - Satish Daud