महापालिका निवडणुकीत मतदारांनी घराणेशाही नाकरल्याचं पाहायला मिळालं होतं. नांदेड महापालिका आणि बदलापूर नगरपरिषदेत बड्या नेत्याच्या कुटु्ंबातील उमेदवारांना मतदारांनीच धूळ चारली होती. जिल्हा परिषदांच्या निवडणुकीतही मतदारांनी घराणेशाही नाकारल्याचे दिसून येत आहे. परभणीतील माजी मंत्री वरपुडकर यांच्या कुटुंबातील ५ पैकी ४ जण पराभूत झाले आहेत. कुटुंबातील ४ जणांचा पराभव हा माजी मंत्री सुरेश वरपुडकर यांना मोठा धक्का मानला जात आहे.

परभणीचे भाजपचे माजी मंत्री सुरेश वरपुडकर यांच्या कुटुंबातील पाच सदस्य जिल्हा परिषदेच्या निवडणुकीत उभे होते. माजी मंत्री सुरेश वरपुडकर यांची मुलगी सोनल देशमुख या झरी जिल्हा परिषद गटातून ठाकरे गटाकडून मैदानात उतरल्या होत्या. सोनल देशमुख यांचा पराभव भाजपचे उमेदवार दिलीप देशमुख यांनी केला आहे.

वरपुडकर यांचे चिरंजीव समशेर वरपूडकर हे शिंगणापूर जिल्हा परिषद गटातून उभे होते. तिथे ठाकरे गटाचे पांडुरंग खिल्लारे यांनी समशेर वरपूडकर यांचा पराभव केला आहे. सून प्रेरणा वरपूडकर या दैठणा जिल्हा परिषद गटातून रिंगणात उभ्या होत्या. या गटात काँग्रेसच्या ज्योत्नना गणेश घाडगे यांनी त्यांचा पराभव केला आहे. त्यामुळे वरपुडकर यांचे घरातील तीनही उमेदवार पराभूत झाले आहेत.

दुसरीकडे लोहगाव जिल्हा परिषद गटात दोन पुतणे उभे होते. त्यातील काँग्रेसच्या चिन्हावर उभे असलेले अजित वरपूडकर यांनी भाजपकडून या निवडणुकीत ऐश्वर्य वरपूडकर यांचा पराभव केलाय.