शुभम देशमुख 

भंडारा : राष्ट्रीय महामार्ग ५३ च्या कडेला असलेल्या शहापूर येथे तीन दुकानांना आज पहाटेच्या सुमारास अचानक आग लागल्याची घटना घडली. या आगीत तीन दुकाने जळून खाक झाली असून तिन्ही दुकानांचे मिळून लाखो रुपयांचे नुकसान झाल्याचा अंदाज वर्तविण्यात आला आहे. 

शहापूर (Shahapur) येथे राष्ट्रीय महामार्गाच्या कडेला असलेल्या नूतन हार्डवेअर, नूतन ऑटोमोबाईल्स अँड इलेक्ट्रिकल्स तसेच शेजारी लागूनच असलेल्या फर्निचरच्या दुकानाला पहाटे दोन वाजण्याच्या सुमारास अचानक आग (Fire) लागली. आगीचे लोळ निघल्याने धावपळ सुरु झाली. पाहता पाहता आगीने उग्र रूप धारण केले. आगीमध्ये तिन्ही दुकानांतून साहित्य जळून राख झाले. आगीमुळे तीन वाहनांचा सांगाडाच शिल्लक राहिला. आगीमध्ये तिन्ही दुकानांचे लाखो रुपयांचे नुकसान झाले. 

मोठा अनर्थ टळला 

तिन्ही दुकाने गावाच्या शेवटच्या भागात असल्याने आग इतरत्र पसरली नाही. त्यामुळे मोठा अनर्थ टळला. अग्निशमन दलाच्यावतीने आग नियंत्रण मिळवण्यात यश आले. मात्र तोपर्यंत उशीर झाला होता. तीन दुकानांपैकी दोन दुकानांचे मालक व त्यांचे कुटुंब दुकानाच्या आत असलेल्या दुसऱ्या मजल्यावर राहतात. दुकानांमध्ये आग लागल्याने त्यांचा बाहेर पडण्याचा मार्ग बंद झाला. (Fire Brigade) अग्निशमन दलाच्या मदतीने त्यांना बाहेर काढण्यात आले.