शुभम देशमुख 
भंडारा : सध्या शाळांना सुट्या असून भाऊबीज आणि दिवाळीनिमित्त गावात असलेल्या मंडईच्या कार्यक्रमाकरिता मामाच्या गावाला आलेल्या दोन चिमुकल्या बहिण भावाचा डोहात बुडून दुर्दैवी मृत्यू झाला. ही घटना भंडारा जिल्ह्यातील मोहाडी तालुक्यांतर्गत येणाऱ्या खडकी गावात घडली. 

सदरच्या घटनेत दिव्या वाढवे (वय 14) आणि प्रेम वाढवे (वय 8) असं मृतक बहिण भावाचे नाव आहे. दरम्यान दिवाळीची सुटी असून दिवाळी आणि भाऊबीजनिमित्ताने सासरवासिनी माहेरी येत असतात. त्यानुसार (Gondia) गोंदिया जिल्ह्यातील अर्जुनी मोरगाव येथून मृत दिव्या व प्रेम हे बहीण- भाऊ दोन दिवसांपूर्वी आई- वडिलांसोबत खडकी येथे मामाच्या गावाला आले होते. सुट्या असल्याने काही दिवस ते येथे थांबले होते. 

दरम्यान दिव्या आणि प्रेम हे दोघे त्यांच्या मामाच्या दोन मुलींसह गाव शेतशिवारात बकरी चराईसाठी गेले होते. यावेळी (Bhandara News) शेतात असलेल्या डोहात ते अंघोळीसाठी उतरले होते. मात्र डोहातील पाण्याचा अंदाज नं आल्यानं तिथे उतरलेल्या दोन्हीही बहीण भावांचा खोल पाण्यात गेले. यात त्यांचा बुडून दुर्दैवी मृत्यू झाला. या घटनेची माहिती सोबत असलेल्या मुलींनी घरी दिली. यानंतर त्यांचा शोध घेत मृतदेह बाहेर काढण्यात आले.