शुभम देशमुख 

भंडारा : गावात जादूटोणा करीत असल्याच्या संशयावरून मध्यरात्री घराबाहेर बोलावून एका ४५ वर्षीय व्यक्तीला (Bhandara) बेदम मारहाण केली. हि घटना लाखांदूर तालुक्यातील चिचोली/अंतरगाव या गावात घडली. या प्रकरणी (Police) पोलिसात गुन्हा दाखल करण्यात आला आहे. (Latest Marathi News)

जादूटोण्याच्या संशयावरून मारहाण करण्यात आलेल्या व्यक्तीचे नाव बेनीराम बळीराम रहिले (वय ४५) असे आहे. घटनेच्या रात्री बेनिराम हा स्वतःच्या घरी कुटुंबीयांसह झोपला होता. दरम्यान, गुलाब तरंडे बेनीरामच्या घरी पोहोचत खासगी कामाच्या बहाणा करून बेनीरामला घराबाहेर बोलविले. आरोपीने मध्यरात्रीच्या सुमारास आवाज देताच घराबाहेर पडलेल्या बेनीरामवर जादूटोणा केल्याचा आरोप करीत (Crime News) मारहाण करायला सुरुवात केली. यावेळी पीडित व्यक्तीच्या घरालगत उपस्थित असलेल्या अन्य दोन व्यक्तींनी देखील बेनीरामला मारपीट केल्याचा आरोप केला आहे.

मारहाणीत बेनिराम गंभीर जखमी झाला आहे. जखमीला नागरिकांनी रात्रीच लाखांदुर येथील ग्रामीण रुग्णालयात दाखल केले.  बेनिराम रहिले यांच्या तक्रारीवरून लाखांदूर पोलिसांनी चिंचोली येथील अरविंद दादाजी तुमन्ने (वय २८), गुलाब नंदलाल तरंडे (वय ३०) व संतोष केवळराम तुमन्ने (वय ४०) यांच्या विरोधात विविध कलमान्वये गुन्हा दाखल केला आहे. लाखांदूरचे ठाणेदार रमाकांत कोकाटे यांच्या मार्गदर्शनात पोलीस हवालदार लोकेश वासनिक तपास करीत आहेत.