भंडारामधून धक्कादायक बातमी समोर आली आहे. शहरातील गोवर्धन नगर भागातील रेल्वे रुळांच्या बाजूला आज सकाळी एका अज्ञात व्यक्तीचा मृतदेह आढळल्याने परिसरात मोठी खळबळ उडाली आहे. या व्यक्तीची हत्या धारदार शस्त्राने गळा चिरून करण्यात आली आहे. याप्रकरणी पोलीस तपास करत आहेत.

मिळालेल्या माहितीनुसार, भंडारा जिल्ह्यातील तुमसर शहरातील गोवर्धन नगर भागातील रेल्वे रुळांच्या बाजूला आज सकाळी एका अज्ञात व्यक्तीचा मृतदेह आढळला. या व्यक्तीचा मृतदेह रेल्वे रुळांलगत असलेल्या एका नाल्यात पडलेला होता. या व्यक्तीच्या गळ्यावर धारदार शस्त्राने वार केलेले होते, ज्यामुळे मोठ्या प्रमाणात रक्तस्राव झाला होता.

हा मृतदेह पाहताच नागरिकांनी तात्काळ पोलिसांना माहिती दिली.या हत्येची माहिती वाऱ्यासारखी शहरात पसरताच गोवर्धन नगर परिसरात नागरिकांनी मोठी गर्दी केली. परिसरातील नागरिकांमध्ये भीती आणि संतापाचे वातावरण निर्माण झाले आहे. पोलिसांचे पथक घटनास्थळी दाखल होईपर्यंत बघ्यांची मोठी गर्दी झाली होती.

घटनेची माहिती मिळताच तुमसर पोलीस स्टेशनचे अधिकारी व कर्मचारी तातडीने घटनास्थळी दाखल झाले. त्यांनी पंचनामा करून मृतदेह ताब्यात घेतला आहे. मृत व्यक्तीची ओळख अद्याप पटलेली नाही. मृतदेह शवविच्छेदनासाठी पाठवण्यात आला आहे. या व्यक्तीच्या हत्येमागचं गूढं देखील अद्याप उलगडलेलं नाही.