शुभम देशमुख, भंडारा

भंडाऱ्यात भीषण अपघात झाला आहे. जिल्ह्याच्या तुमसर तालुक्यातील माडगी येथील वैनगंगा नदीच्या पुलावर आज पहाटेच्या सुमारास अज्ञात वाहनाने दुचाकीला जोरदार धडक दिली. या अपघातात एका तरुणाचा जागीच मृत्यू झाला आहे. मृत तरुणाचे नाव अमोल खोब्रागडे असे आहे. घटनेनंतर अज्ञात वाहनचालक घटनास्थळावरुन फरार झाला आहे. पोलीस त्याचा शोध घेत आहेत. या घटनेमुळे परिसरात हळहळ व्यक्त केली जात आहे.

मिळालेल्या माहितीनुसार, अमोल हा तुमसर येथील सनफ्लॅग कंपनीत कंत्राटी कामगार म्हणून कार्यरत होता. आज पहाटे ५ वाजेच्या सुमारास तो आपल्या दुचाकीने देव्हाडा येथून तुमसरच्या दिशेने येत असताना, माडगी पुलावर समोरून येणाऱ्या एका अज्ञात वाहनाने त्याला जोरात धडक दिली.

ही धडक इतकी भीषण होती की, अमोलचा जागीच मृत्यू झाला. अमोल खोब्रागडे हा विवाहित असून त्याच्या पश्चात पत्नी आणि अवघ्या तीन महिन्यांची चिमुकली मुलगी आहे. घराचा कर्ता पुरुष आणि नुकताच बाबा झालेल्या अमोलचा अशा अपघाती मृत्यू झाल्याने खोब्रागडे कुटुंबावर दुःखाचा डोंगर कोसळला आहे.

तीन महिन्यांच्या मुलीच्या डोक्यावरून वडिलांचे छत्र हरपल्याने परिसरातून तीव्र संवेदना व्यक्त होत आहेत. अपघात घडल्यानंतर अज्ञात वाहन चालक वाहनासह घटनास्थळावरून पसार झाला आहे. अद्याप त्या वाहनाचा शोध लागलेला नाही. पोलिसांनी घटनेचा पंचनामा केला असून अज्ञात वाहनचालकाचा शोध सुरू केला आहे.