शुभम देशमुख 
भंडारा : पती- पत्नीसह दोन मुलांना घेऊन चिखला येथे जात असताना गाडी स्लीप झाल्याने दुचाकीस्वार खाली कोसळले. यात पती व दोन मुले रस्त्याच्या बाजूला तर पत्नी रस्त्यावर कोसळली. याच दरम्यान मार्गावरून जाणाऱ्या एसटी बसच्या मागील चाकाखाली आली. डोक्यावरून चाक गेल्याने महिलेचा जागीच मृत्यू झाल्याची घटना घडली. भंडारा जिल्ह्यातील सिहोरा जवळील वाहनी येथे सदरचा अपघात घडला. 

भंडारा जिल्ह्यातील चिखला येथील मीना ओमेश्वर कडू (वय ३२) असे अपघातात मृत झालेल्या महिलेचे नाव आहे. तुमसर तालुक्यातील सिहोरा जवळील वाहनी येथे अपघात घडला. तुमसर तालुक्यातील चिखला येथील ओमेश्वर कडू हा पत्नी मीना व दोन मुलांना घेऊन मोटारसायकलने तिरोडा तालुक्यातील सरांडी येथून आपल्या स्वगावी जाण्यासाठी निघाले होते. मात्र घरी पोहचण्यापूर्वीच नियतीने घात  केला. 

शेणावरून चाक गेल्याने दुचाकी स्लिप 

गावाकडे जात असतांना वाहनी येथील पाण्याच्या टाकीजवळ सिहोराकडून जाणारी एसटी बस समोरून येताना दिसली. यामुळे दुचाकीस्वार ओमेश्वर कडू याने मोटारसायकल रस्त्याच्या बाजूला घेण्याचा प्रयत्न केला. या प्रयत्नात मोटारसायकलचे चाक रस्त्यावर पडलेल्या शेणावरुन गेल्याने मोटारसायकल स्लीप झाली. त्यामुळे ओमेश्वर कडू व दोन मुले हे रस्त्याच्या डाव्या बाजूला फेकले गेले. तर पत्नी मीना ही रस्त्यावर पडली. 

सुदैवाने मुले बचावली 

महिला खाली पडताच समोरून आलेल्या एसटीचे चाक डोक्यावरून गेल्याने अक्षरशः डोक्याचा चेंदामेंदा होऊन महिलेचा जागीच मृत्यू झाला. सुदैवाने या अपघातात पतीसह दोन्ही मुले सुदैवाने बचावले. अपघाताची माहिती सिहोरा पोलिसांना समजताच ठाणेदार विजय कसोधन पथकासह घटनास्थळी आले. पोलिसांनी पंचनामा करत घटनेची नोंद केली असून पुढील तपास पोलीस करत आहेत.