बीडचे माजी उपसरपंच गोविंद बर्गे यांनी स्वत:वर गोळ्या झाडून आत्महत्या केल्याची माहिती आहे. आत्महत्या करण्यास प्रवृत्त केल्याप्रकणी नर्तिका पूजा गायकवाडला पोलिसांनी ताब्यात घेतलं आहे. सध्या ती ३ दिवसांच्या पोलीस कोठडीत आहे. सध्या वैराग पोलिसांकडून या प्रकरणाचा अधिक तपास सुरू आहे. घटनास्थळी वापरण्यात आलेली पिस्तूल नेमकी कुठून आली? त्यात किती बुलेट होत्या?गोविंद बर्गेंकडे बुलेट कशी आली? याचा तपास सुरू आहे. तपासात गोविंद यांनी पूजाला प्लॉट गिफ्ट केल्याची माहिती समोर आली आहे.

सध्या पोलिसांनी कॉल लॉग तसेच आर्थिक व्यवहार तपासण्यासाठी बँकेतील स्टेटमेंट जप्त केले आहेत. पूजासोबत झालेले आर्थिक व्यवहार, मोबाईलवरील संवाद, याची माहिती मिळवण्यासाठी पोलिसांचा तपास सुरू आहे. यासाठी अतिरिक्त वेळ आवश्यक असल्याचं पोलिसांनी न्यायालयाकडे स्पष्ट केलं. त्यामुळे पुजाची पोलीस कोठडी वाढण्याची शक्यता आहे.

गोविंद यांनी आतापर्यंत पूजाला महागड्या भेटवस्तू दिल्या आहेत. महागडा मोबाईल दिला आहे. तरीही पूजाच्या मागण्यांची लिस्ट काही संपत नव्हती. तिनं बंगल्याचीही मागणी केली होती. गोविंद यांनी वैराग येथील सुमारे साडे सात लाख रूपयांचा प्लॉट खरेदी करून दिला होता, हे तपासातून उघड झालं आहे.

प्लॉट रजिस्टर खरेदीच्या कागदपत्रात गोविंद बर्गे यांनी साक्षीदार म्हणून सही केलीय. यावरून गोविंद यांनीच पूजाला प्लॉट खरेदी करून दिल्याची माहिती आहे. त्यामुळे नातेवाईक करत असलेल्या आरोपांवर तथ्य सापडलं आहे. दरम्यान, गोविंद यांनी पूजावर किती रूपयांची उधळण केली आहे, हे लवकरच पोलिसांच्या तपासातून उघड होईल.