बीडमध्ये भीषण अपघाताची घटना उघडकीस आली आहे. दुचाकीवरून जात असलेल्या दोघांना स्कॉर्पिओने उडवलं. ही घटना शनिवारी मध्य रात्री अडीच वाजण्याच्या सुमारास घडली. या अपघातानंतर दोघेही गंभीर जखमी झाले असून, दोघांवर बीडच्या खासगी रूग्णालयात उपचार सुरू आहेत. त्यांची प्रकृती चिंताजनक असून, बीड शहर पोलिसांनी ६ जणांविरोधात गुन्हा दाखल करत एकाला अटक केली आहे.

मोहम्मद समी मोहम्मद कलीम शेख आणि सय्यद दानिश सय्यद एत शाम उल हक असे अपघातात जखमी झालेल्या व्यक्तींची नावे आहेत. हे दोघे रात्री आपल्या स्कुटीवर घराकडे जात असताना जालना रोडवर स्कॉर्पिओ चालकाशी त्यांचा वाद झाला. त्यानंतर दुचाकीवरून दोघे निघून गेले. भरधाव स्कॉर्पिओने त्यांचा पाठलाग केला.

जालना रोडवरून मुंडा रोड मार्गे पाठलाग करत स्कॉर्पिओने डीपी रोडवरील सारडा कॅपिटलसमोर दुचाकीला जोरदार धडक दिली. धडक दिल्यानंतर स्कार्पिओ चालक फरार झाला. जोराची धडक बसल्यामुळे दोघेही डोक्यावर पडले आणि रक्तबंबाळ झाले. डोक्याला जबर मार लागल्यानंतर दोघेही रस्त्यावर बेशुद्ध पडले.

त्यावेळी पेट्रोलिंगवर असलेल्या पोलिसांनी तातडीने येऊन त्यांना उपचारासाठी रुग्णालयात दाखल केले. घटनास्थळी रक्ताचा सडा पडला होता. यापैकी एक जण पाच मिनिटांनी उठण्याचा प्रयत्न केला, परंतु काही सेकंदातच तो पुन्हा जमिनीवर कोसळला.

स्कॉर्पिओ कोणाची होती आणि त्यात किती जण होते? याचा शोध पोलिसांनी दिवसभर घेतला, परंतु पोलिसांच्या हाती काहीच आले नाही. रविवारी रात्री उशिरा पोलिसांनी स्कॉर्पिओ पकडली. या प्रकरणी सहा जणांविरोधात बीड शहर पोलिस ठाण्यात गुन्हा दाखल करण्यात आला आहे. सध्या पोलिसांकडून तपास सुरू आहे.