बीड : लॉकडाऊनच्या कालावधीत गेल्या 7 महिन्या पासून वेतन न मिळाल्यामुळे, आश्रम शाळेच्या कर्मचाऱ्यांनी सामाजिक न्याय विभागाच्या बीड कार्यालयासमोर अन्नत्याग आंदोलनाचा पवित्रा घेतला आहे. पाटोदा तालुक्यातील वडझरी येथील, संत शिरोमणी भगवान बाबा प्राथमिक आश्रम शाळेतील कर्मचाऱ्यांना, संस्थाचालक आणि मुख्याध्यापक वेळचे वेळी वेतन करत नाहीत. तसेच इतर लाभ दिले जात नाहीत. असा आरोप करत संस्थाचालक आणि मुख्याध्यापक यांच्या जाचाला कंटाळून, शिक्षकांनी अन्नत्याग आंदोलन सुरू केले आहे.

हे देखील पहा -

बोगस विद्यार्थ्यांमुळे गाजलेल्या या आश्रम शाळेतील शिक्षकांची होणारी पिळवणूक थांबवावी. यासाठी शिक्षकांनी सामाजिक न्याय मंत्री धनंजय मुंडे यांच्याकडे साकडे घालत, मंत्रिमहोदय आम्हाला न्याय द्या. अशी मागणी केली आहे. विशेष म्हणजे संत शिरोमणी भगवान प्राथमिक आश्रम शाळेत बोगस विद्यार्थी आणि बोगस शिक्षक भरती या प्रकरणात प्रशासक नेमण्यात यावा. यासाठी वारंवार विभागीय पातळीवरून सचिवांपर्यंत कारवाईचे आदेश आले.

मात्र कारवाई केली गेली नाही. म्हणून प्रशासक नियुक्त करून शासनाची होणारी फसवणूक ही थांबवावी. अशी मागणी या शिक्षकांनी केली आहे. यामुळे पुन्हा एकदा सामाजिक नेते धनंजय मुंडे यांचा जिल्ह्यात शिक्षकावर संस्थाचालकाकडून होणारा अन्याय समोर आला आहे. अशा संस्थाचालकावर कारवाई करावी अशी मागणी होत आहे.

Edited By : Krushnarav Sathe