बीड : जुन्या वादाची कुरापत काढून आई आणि मुलाला बेदम मारहाण केल्याची धक्कादायक घटना बीडचा घाटशीळ पारगाव येथे उघडकीस आली आहे. या प्रकरणात गंभीर जखमी असलेल्या रुग्णावर बीड जिल्हा रुग्णालयात उपचार सुरू आहेत. मारहाणीमुळे संपूर्ण अंगावर वळ उमटले आहेत. त्यामुळे किती अमानुष मारहाण केली आहे हे दिसून येत आहे. या प्रकरणात गुन्हा दाखल करण्याची प्रक्रिया शिरूर पोलीस ठाण्यात सुरू आहे. आता या घटनेनं खळबळ उडाली असून आरोपीवर कठोर कारवाई करावी अशी मागणी करण्यात आलं आहे.

बीडच्या शिरूर तालुक्यातील घाटशीळ पारगाव येथील कृष्णा दादासाहेब घोडके (वय २७) हा तरुण शेतात काम करत असताना अचानक त्याच्यावर हल्ला करण्यात आला. तसेच कृष्णा याची आई संजीवनी दादासाहेब घोडके (वय ५०) या शेतात भाकरी घेऊन येत असताना त्यांनाही मारहाण करण्यात आली. नातेवाईकांनीच जुना राग डोक्यात ठेवून आठ ते दहा जणांनी मारहाण केली.