योगेश काशीद 
बीड : घरफोडी करण्यासोबत चोरट्यानी आता कंपनीत प्रवेश करत चोरी करण्याचे सुरु केले आहे. थेट गाडी घेऊन येत कंपनीतील माल गाडीत टाकून पसार होत असल्याच्या घटना समोर आल्या आहेत. अशात परळी येथील तेलगाव रोडवर तुळजाई ऍग्रो मशनरी स्टोअरमध्ये चोरी झाल्याचे समोर आले आहे. या ठिकाणाहून चोरट्यांनी लाखो रुपयांची माल लंपास केला आहे. 

बीड जिल्ह्यातील परळी - तेलगाव रोडवर असलेल्या रिलायन्स पेट्रोल पंपाजवळ विशाल चव्हाण यांची तुळजाई ऍग्रो मशनरी स्टोअर आहे. या स्टोअरमध्ये चोरी झाल्याची घटना घडली आहे. या चोरीचा सीसीटीव्ही फुटेज समोर आला असून यामध्ये दोन चोरटे स्टोअरच्या शटरचे कुलूप तोडून आत प्रवेश करताना दिसत आहेत. या घटनेत चोरट्यांनी दुकानातून लाखो रुपयांचे साहित्य लंपास केले आहे.

इलेक्ट्रिक मोटार, सबमर्सिबल पंप लांबवीले 
तुळजाई ऍग्रो मशनरी स्टोअरमध्ये चोरी झाल्याची घटना २८ जून रोजी पहाटे घडली आहे. दरम्यान दुकानाचे मालक विशाल चव्हाण यांनी दिलेल्या माहितीनुसार चोरट्यांनी शटरचे कुलूप तोडून दुकानात प्रवेश केला. यानंतर चोरट्यांनी दुकानातील इलेक्ट्रिक मोटार व सबमर्सिबल पंप, बोरवेल असे लाखो रुपयांपेक्षा जास्त किमतीचे साहित्य चोरून नेले. या घटनेची माहिती मिळताच पोलिसांनी घटनास्थळी धाव घेतली आणि पंचनामा केला. 

चोरट्यांचा शोध सुरु 

दरम्यान मशीनरी स्टोअरमध्ये चोरी झाल्याचे लक्षात आल्यानंतर विशाल चव्हाण यांनी पोलिसात तक्रार दिली. यानंतर पोलिसांनी सीसीटीव्हीची तपासणी केली असता यात दोन चोरटे दिसून येत आहे. त्यांनी चोरी केलेला माल गाडीत टाकून नेला आहे. त्यानुसार चोरीचा तपास सुरू असून सीसीटीव्ही फुटेजच्या आधारे चोरट्यांचा शोध घेतला जात आहे.