Beed Shivshahi Bus Fire

बीड जिल्ह्यातील परळी शहरातून एक धक्कादायक घटना समोर आली आहे. लातूरहून प्रवाशी घेऊन परळी मार्गे परभणीकडे निघालेल्या एसटी महामंडळाच्या शिवशाही बसला अचानक आग लागली. शुक्रवारी रात्रीच्या सुमारास ही घटना घडली. आग लागल्याचं कळताच चालकाने सतर्कता दाखवत बस थांबवली. (Latest Marathi News)

बसमधील प्रवाशांना वेळेवर बाहेर काढण्यात आलं. आगीची माहिती मिळताच घटनास्थळी अग्निशमन दलाचे तीन बंब दाखल झाले. त्यांनी आग विझवण्याचा प्रयत्न केला, मात्र तोपर्यंत बस जळून खाक झाली. सुदैवाने या घटनेत कुठलीही जीवितहानी झाली नाही.

मात्र, धावत्या बसने अचानक पेट घेतल्याने प्रवाशांमध्ये भीतीचं वातावरण पसरलं होतं. वायरचे स्पार्किंग आणि टायर फुटल्याने आग लागल्याची प्राथामिक माहिती आहे. हा थरारक प्रकार परळी शहरातील छत्रपती शिवाजी महाराज चौकात रात्री साडेनऊच्या सुमारास घडला. या घटनेमुळे परिसरात एकच गोंधळ उडाला.

सुदैवाने बस वाहक व चालकाने गाडी वेळीच थांबवली. बसमधील २० प्रवाशांना तातडीने खाली उतरवण्यात आलं. या घटनेची माहिती अग्निशमन दलाला देण्यात आली. आगीची माहिती मिळताच अग्निशमन दलाच्या जवानांनी तातडीने घटनास्थळी धाव घेत आग विझवण्याचा प्रयत्न केला. मात्र, तोपर्यंत बस जळून खाक झाली होती.

Edited by - Satish Daud