योगेश काशीद 
बीड : अफू, गांजा लागवड करण्यावर बंदी करण्यात आली आहे. असे असताना देखील अनेकजण छुप्या पद्धतीने अफूची शेती करत असल्याचे समोर आले आहे. अशाच प्रकारे बीड जिल्ह्यातील धारूर तालुक्यात अफूची शेती करण्यात आली होती. हि शेती पोलिसांनी कारवाई करत उध्वस्त केली असून कारवाईत पोलिसांकडून साधारण ५० गोण्या अफू जप्त करण्यात आला आहे. 

नशेखोरांकडून नशा करण्यासाठी अफूचा वापर मोठ्या प्रमाणात केला जातो. यामुळे याची छुप्या पद्धतीने लागवड करत त्याची वाहतूक करून विक्री देखील करण्यात येत असते. दरम्यान अफू पीकवण्यावर शासनाने निर्बंध घातले आहेत. असे असताना देखील चोरून लपून अफू लागवड करत त्याची विक्री करण्यात येत असल्याचे अनेकदा समोर आले आहे. बीड जिल्ह्यात देखील अफूची शेती केली जात असल्याचा प्रकार समोर आला आहे. 

तीन गुंठे क्षेत्रात लागवड 

बीडच्या धारूर तालुक्यातील पिंपळवाडा येथे रामहरी कारभारी तिडके या शेतकऱ्याने चक्क बालाघाट पर्वतरांगेतील तीन गुंठे क्षेत्रावर शेततळ्याच्या पाण्यावर अफूची शेती पिकवल्याची धक्कादायक माहिती समोर आली. या प्रकरणी पोलिसांना माहिती मिळाली होती. यानंतर पोलिसांनी सदर ठिकाणी धाड टाकत कारवाई केली आहे. 

५० गोण्या अफू जप्त 
अफूच्या शेतीबाबत माहिती मिळताच बीड एलसीबी आणि धारूर पोलिसांनी संयुक्तरित्या कारवाई केली आहे. या कारवाईत शेतातील अफू उपटून घेत साधारण ५० गोण्या अफू जप्त केला. दरम्यान शेतकरी रामहरी तिडके हा गायब झाला आहे. या प्रकरणी धारूर पोलीस याबाबतचा पुढील तपास करत आहेत.