Beed Crime News : राज्यात गेल्या काही दिवसांत गुन्हेगारीच्या घटनांमध्ये मोठी वाढ झाल्याचे पाहायला मिळत आहे. अनैतिक संबंध, कौटुंबिक कलह, आर्थिक फसवणूक यातून हत्या आणि आत्महत्येच्या घटना सातत्याने समोर येत आहेत. त्यातच आता राज्यातील बीड येथून आणखी एक धक्कादायक बातमी समोर आली आहे. या धक्कादायक घटनेने मोठी खळबळ उडाली आहे.

घरातील कामे का केली नाही, असे म्हणत संतापलेल्या पतीने पत्नीला विष पाजून जिवे मारण्याचा प्रयत्न केला. ही धक्कादायक घटना बीडच्या (Beed) अंबाजोगाई तालुक्यातील नवाबवाडी येथे उघडकीस आली आहे. रेखा गोविंद घुले असं विवाहित महिलेचे नाव आहे. दरम्यान याप्रकरणी बीडच्या बर्दापूर पोलीस (Police) ठाण्यात आरोपी पती गोविंद बाबासाहेब घुले आणि अमृत लिंबाजी घुले यांच्यावर गुन्हा दाखल करण्यात आला आहे.

विवाहिता रेखा घुले यांच्या फिर्यादीवरून, 24 फेब्रुवारी रोजी दुपारी 2 वाजेच्या दरम्यान पती गोविंद आणि अन्य एकजण घरी आला. यावेळी घरात सर्वत्र अस्ताव्यस्त पसारा पडलेला होता. यावर पतीने कामे केली नाहीस का? असे पत्नीला विचारले. यावर रेखा यांनी मुलगी रडत होती, मदतीला कोणीही नव्हते त्यामुळे कामे राहिले, असे सांगितले. (Beed Crime News)

मात्र गोविंदने कशाचाही विचार न करता घरातील विषारी औषधचा डब्बा उचलत तू मर, मला तुझी गरज नाही असे म्हणत हे विषारी औषध पाजण्याचा प्रयत्न केला. यावेळी आरोपी अमृतने रेखा यांचे हात, पाय धरले होते. सुदैवाने पोटात विषारी औषध न गेल्याने मोठा अनर्थ टळला. दरम्यान या घटनेने परिसरात खळबळ उडाली आहे. या घटनेचा पुढील तपास पोलिसांकडून करण्यात येत आहे.

Edited By - Shivani Tichkule