योगेश काशीद 

बीड : प्रवाशांना घेऊन जाणाऱ्या राज्य परिवहन महामंडळाची बस आणि कारची समोरासमोर धडक होऊन भीषण अपघात झाला. तेलगाव- धारूर राष्ट्रीय महामार्गावरील चोरंबा जवळ एहा भीषण अपघात झाला असून अपघातात कार मधील दोघे जण गंभीर जखमी झाले आहे. जखमी दोघांना लागलीच रुग्णालयात उपचारासाठी दाखल करण्यात आला आहे. 

बीड जिल्ह्यातील तेलगाव - धारूर राष्ट्रीय महामार्गावरील चोरंबा जवळ एसटी बस व कारचा अपघात झाला आहे. ही घटना काल घडली असून या अपघातात कार मधील दोघे जखमी झाले आहेत. पंढरपुरहुन माजलगाव कडे जाणारी कार या गाडीला माजलगाव कोल्हापूर एसटी बसने चोरंबा गावाजवळील अरुंद पुलावर जोरदार धडक दिल्याने भिषण अपघात झाला या अपघातात कारचे मोठे नुकसान झाले आहे. 

दोघे गंभीर जखमी 

बसची कारला समोरून जोरदार धडक दिल्याने झालेल्या भीषण अपघातात कार मधील गोपिनाथ देशमुख व ज्योती देशमुख हे दो़घे गंभीर जखमी झाले आहे. अपघातानंतर परिसरातील नागरिकांनी अपघातस्थळी धाव घेत कारमधील जखमींना बाहेर काढले. यानंतर त्यांना धारूर ग्रामीण रुग्णालयात प्राथमिक उपचार करून पुढील उपचारासाठी अंबाजोगाई येथील स्वामी रामानंद तीर्थ ग्रामीण शासकीय रुग्णालयात हलविण्यात आले आहे.

रस्ता रुंदीकरणाची मागणी 

दरम्यान राष्ट्रीय महामार्ग क्रमांक ५४८ वर नेहमीच अपघाताच्या घटना घडत असल्याने या रस्त्याचे रुंदीकरण करण्याची मागणी मागील काही वर्षांपासून ग्रामस्थांकडून करण्यात येत आहे. मात्र याकडे प्रशासनाकडून दुर्लक्ष करण्यात येत आहे. यातच पुन्हा एक अपघात झाल्याने रस्ता रुंदीकरणाची मागणी जोर धरू लागली आहे.