बीड : बीडच्या अंबाजोगाई एटीएमवर पैसे काढता येत नसल्याने एटीएम कार्ड अनोळखीच्या हाती सोपविणे एकास अंगलट आले आहे. एका भामट्याने एटीएम कार्डची (ATM Card) आदलाबदल करून तब्बल ९७ हजारांना गंडा घातला आहे. (Breaking Marathi News)

मोरेवाडी (ता. अंबाजोगाई) येथील दिवाकर भगवान दळवे असे फसवणूक झालेल्या वृद्ध व्यक्तीचे नाव आहे. ते एसटी महामंडळाचे निवृत्त चालक आहेत. ८ नोव्हेंबरला ते पैसे काढण्यासाठी शहरातील बँक ऑफ महाराष्ट्रच्या एटीएमवर गेले होते. पैसे काढता येईना म्हणून तेथे उभ्या असलेल्या अनोळखी व्यक्तीच्या हाती त्यांनी एटीएम कार्ड सोपविले.

कार्डाचा पिनही विचारला

त्याने पिन क्रमांक जाणून घेतला व कार्डची आदलाबदल केली. त्यानंतर खात्यातून ९७ हजार रुपये काढून घेतले. दरम्यान दळवे यांच्या फिर्यादीवरून अंबाजोगाई शहर पोलीस ठाण्यात अज्ञात भामट्यावर गुन्हा दाखल झाला आहे.