Beed : बीडच्या गेवराईतील लुखामसला गावचे माजी उपसरपंच गोविंद बर्गे यांच्या मृत्यूने मोठी खळबळ उडाली आहे. स्वत:वर गोळी चालवत त्यांनी आत्महत्या केल्याची माहिती समोर आली आहे. या प्रकरणात नर्तिका पूजा गायकवाडचे नाव समोर आले आहे. पूजाने तिचे आणि गोविंद बर्गे यांचे प्रेमसंबंध होते अशी कबुलीही दिली आहे.

पूजा गायकवाडचे गोविंद बर्गे यांच्याशी प्रेमसंबंध होते. बर्गे हे पूजाला महागड्या गोष्टी भेटवस्तू म्हणून देत असत. जसजसे ते गोष्टी देऊ लागले. तसतशी ती वेगवेगळ्या गोष्टी मागू लागली. बार्शीमध्ये पूजा गायकवाडच्या नावावर गोविंद बर्गे यांनी दीड गुंठा जमीन दिल्याचे समोर आले आहे. जमिनीच्या व्यवहाराच्या कागदपत्रांमध्ये बर्गे यांचे नाव आणि सही देखील आहे.

पूजाने गोविंद बर्गे यांच्याकडे बंगल्याची मागणी केली होती. बंगला नावावर करा नाहीतर बलात्काराचा खोटा गुन्हा दाखल करेन अशी धमकी दिली होती, असा आरोप गोविंद बर्गे यांच्या कुटुंबियांनी केला आहे. सततच्या मागणीमुळे, दबावामुळे त्यांनी आत्महत्या केल्याचा आरोप देखील केला जात आहे. या प्रकरणी पूजाला ३ दिवसांची कोठडी सुनावण्यात आली आहे.

कोण आहे पूजा गायकवाड?

२१ वर्षीय पूजा गायकवाड ही नर्तिका आहे. ती सोलापूरच्या बार्शीतील सासुरे गावची रहिवासी आहे. ती थापडीतांडा गावातील कलाकेंद्रात जात असल्याची माहिती समोर आली आहे. यात ठिकाणी तिची गोविंद बर्गे यांच्याशी भेट दिली. त्यानंतर ती पारगाव कला केंद्रात गेली. तिला भेटायला बर्गे पारगावला जात असत. यातून त्यांच्यामधील संबंध वाढत गेले.

पूजा सोशल मीडियावर प्रचंड सक्रीय आहे. गोविंद बर्गे मृत्यू प्रकरणामुळे तिच्या नावाची खूप चर्चा होत आहे. या घटनेनंतर पूजाच्या फॉलोवर्समध्ये मोठी वाढ झाली आहे. काही दिवसांपूर्वी तिचे फॉलोअर्स ५००-७०० होते. आता तिच्या फॉलोवर्सची संख्या ३० हजारांपेक्षा जास्त झाली आहे. ५०० रुपयांची नोट हातात घेत केलेल्या तिच्या रीलची तुफान चर्चा होत आहे.