योगेश काशिद, साम प्रतिनिधी

संतोष देशमुख हत्या प्रकरणातील आरोपींचा माज काही कमी होताना दिसत नाहीये. देशमुख हत्या प्रकरणातील आरोपीने जिल्हा कारागृहात कर्मचाऱ्याला जीवे मारण्याची धमकी दिलीय. बाबा कवठे असं या कर्मचाऱ्याचे नाव आहे. बीडच्या मस्साजोगचे सरपंच संतोष देशमुख यांच्या हत्या प्रकरणातील आरोपी सध्याला बीड जिल्ह्यातील कारागृहात आहेत.

देशमुख हत्या प्रकरणातील आरोपींनी जिल्हा कारागृहातील बाबा कवठे नावाच्या कर्मचाऱ्याला जीवे मारण्याची धमकी दिलीय. कराड गँगची जिल्हा कारागृहात दादागिरी चालू आहे. यापरकरणी बीडचे शिवसेना शिंदे गटाचे जिल्हाप्रमुख स्वप्निल गलधर यांची फेसबुक पोस्ट सध्या चांगलीच व्हायरल होतेय.

दरम्यान जुलै महिन्यातही कराड गँगमधील एका गुंडाचा एक व्हिडिओ व्हायरल झाला होता. यात आमदारांना शिवीगाळ आणि धमक्या दिल्या होत्या. वाल्मीक कराड जेलमध्ये असला तरी त्याच्या गुन्हेगारी गँगचे दहशत माजवणं सुरूच आहे. कराडचा जवळचा सहकारी संदीप तांदळे याने राष्ट्रवादीचे आमदार जितेंद्र आव्हाड, बीडचे आमदार सुरेश धस आणि बाळा बांगर यांच्याविरोधात अश्लील भाषेत शिवीगाळ केली होती.

वाल्मीक कराड तुरुंगातून बाहेर येणार? कथित कॉल रेकॉर्डिंगनं उडवली खळबळ

वाल्मीक कराड लवकरच तुरुंगातून बाहेर येणार असल्याची चर्चा सुरू झालीय. या प्रकरणी आमदार धनंजय मुंडे यांच्या एका निकटवर्तीय व्यक्तीचा कॉल रेकॉर्डिंग व्हायरल झाली होती, त्यात हा दावा करण्यात आला होता. व्हायरल झालेली कॉल रेकॉर्डिंग ही परळीतील माजी नगराध्यक्ष आणि माजी मंत्री धनंजय मुंडे यांचे निकटवर्तीय बाजीराव धर्माधिकारी यांची होती.

वाल्मीक कराडच्या विरोधात सोशल मीडियावर पोस्ट केल्यानं एका तरुणाला कराडच्या समर्थकांनी मारहाण केली होती. या तरुणाने त्याप्रकरणी पोलिसात तक्रार दाखल केली. परंतु तक्रार दाखल केल्यानंतरही पोलिसांनी गुन्हा दाखल केला नसल्याचा प्रकार काही महिन्यांपूर्वी घडला होता.