योगेश काशीद 

बीड : आष्टी तालुक्यातील हिवरा या गावातून एका १७ वर्षीय अल्पवयीन मुलींला फूस लावून तिचे अपहरण करण्यात आले आहे. साधारण वीस दिवसांपासून हि मुलगी गायब असताना देखील स्थानिक पोलीस राजकीय दबावापोटी कारवाई कोणतीही करत नसल्याचा आरोप नातेवाईकांनी केला आहे. तर आज मुलीच्या आई- वडिलांसह नातेवाईकांची पोलीस अधीक्षक कार्यालयात धाव घेत यासंदर्भात निवेदन दिले आहे. 

बीड जिल्ह्यातील आष्टी तालुक्याच्या अंभोरा पोलीस स्टेशन हद्दीतील हिवरा या गावात सदरची घटना घडली आहे. हिवरा येथील १७ वर्षीय अल्पवयीन मुलीचे अपहरण करत मुलीला फुस लावत गायब करण्यात आले आहे. या प्रकरणी मुलीच्या आई- वडिलांनी पोलिसात तक्रार देखील दाखल केली आहे. मात्र गेल्या वीस दिवसांपासून मुलगी कुठे आहे? याचा तपास अद्याप लागलेला नाही. यामुळे मुलीचे नातेवाईक चिंतेत आहेत.

आई- वडिलांचा गंभीर आरोप 

दरम्यान तक्रार दिल्यानंतर तपास धीम्या गतीने होत असल्याने आम्ही पोलीस स्टेशनला गेलो असता मुलगी आज येईल, उद्या येईल असे स्थानिक पोलीसांकडून उत्तर दिले जात असल्याचे तिच्या नातेवाईकांनी सांगितले. राजकीय दबाव असल्यामुळे पोलीस कार्यवाही करत नाहीत; असा आरोप देखील संबंधित मुलीच्या आई-वडिलांनी केला आहे. 

निवेदन देत दिला उपोषणाचा इशारा 

तर आमची मुलगी कुठे आहे; आहे का नाही? हे आम्हाला माहीत नाही. म्हणून आमच्या मुलीचा शोध लावावा व मुलगी कुठे आहे हे आम्हाला माहित झाले पाहिजे; अशी मागणी संबंधित नातेवाईकांनी केली आहे. आरोपी मोकाट फिरत असून त्यांच्यावर पोलीस काहीही कार्यवाही करत नाही. न्याय मिळाला नाही; तर आम्ही उपोषण करू असा इशारा त्यांनी दिला आहे. याबाबत पोलीस अधीक्षकांची भेट घेऊन त्यांनी निवेदन दिले आहे.