योगेश काशिद, साम प्रतिनिधी

बीड जिल्ह्यातील माजलगाव तालुक्यातील लहामेवाडी येथे अत्यंत धक्कादायक घटना समोर आली असून, पत्नी नांदायला येत नसल्याच्या रागातून एका पित्याने स्वतःच्या दोन चिमुकल्या मुलांच्या अंगावर डिझेल टाकून त्यांना जाळण्याचा प्रयत्न केल्याची घटना घडली आहे. या प्रकरणामुळे परिसरात मोठी खळबळ उडाली आहे.

मिळालेल्या माहितीनुसार, महेश सामसे असे आरोपी वडिलांचे नाव असून त्याची पत्नी काही दिवसांपासून माहेरी राहत होती. पत्नी नांदायला येत नसल्यामुळे महेश सामसे हा मानसिक तणावात होता. याच रागातून त्याने आपल्या दोन लहान मुलांच्या अंगावर डिझेल टाकून त्यांना पेटवून देण्याचा प्रयत्न केल्याचा आरोप आहे.

घटनेची माहिती मिळताच परिसरातील नागरिकांनी तातडीने धाव घेत मुलांना वाचविण्याचा प्रयत्न केला. सुदैवाने मोठा अनर्थ टळला असून मुलांना वेळेत सुरक्षित बाहेर काढण्यात आल्याची माहिती समोर येत आहे. या घटनेनंतर गावात संतापाचे वातावरण निर्माण झाले आहे. या प्रकरणी माजलगाव ग्रामीण पोलीस स्टेशनमध्ये गुन्हा दाखल करण्यात आला असून पोलिसांनी आरोपीविरुद्ध विविध कलमान्वये कारवाई सुरू केली आहे. घटनेचा पुढील तपास माजलगाव ग्रामीण पोलीस करत आहेत. कौटुंबिक वादातून स्वतःच्या लेकरांच्याच जीवावर उठण्याचा प्रकार समोर आल्याने नागरिकांकडून हळहळ व्यक्त केली जात आहे.