Grocer : बीडमधून एक खळबळजनक बातामी समोर आली आहे. ग्राहकाच्या त्रासाला कंटाळून एका किराणा दुकानदाराने आत्महत्या केली आहे. ही धक्कादायक घटना बीडच्या धारुर तालुक्यातील कान्नापूर येथे घडली. अविनाश आशोक देशमुख (वय 32, रा. कान्नापूर ता. धारुर) असे गळफास घेऊन आत्महत्या केलेल्या दुकानदार तरुणाचे नाव आहे. (Beed News)

पोलीसांनी दिलेल्या माहितीनुसार, मयत अविनाश देशमुख यांचे कान्नापूर येथे दुकान आहे. गावातीलच स्वप्नील, सुरज, सुमित्रा यांना अविनाशने किराणा साहित्य उधार दिले नाही. याचा राग आल्याने त्यांनी अविनाश देशमुख यांना सतत त्रास देण्यास सुरुवात केली. त्याचा वारंवार मानिसक छळ केला. या त्रासाला कंटाळून अविनाशने स्वतःच्या शेतात गळफास घेऊन आत्महत्या केली.

दरम्यान या प्रकरणी मयताचे भाऊ संतोष देशमुख यांच्या फिर्यादीवरून बीडच्या सिरसाळा पोलीस ठाण्यात, स्वप्नील रामकिशन देशमुख, सूरज रामकिशन देशमुख, सुमित्रा रामकिशन देशमुख यांच्यावर कलम 306, 504, 506 नुसार गुन्हा दाखल करण्यात आला.

अनेक व्यक्ती किराणा दुकानात उधारीवर सामान घेतात. उधारीचे पैसे वेळेवर न दिल्यास त्या दुकान मालकाचे यात मोठे नुकसान होते. अविनाश यांच्या दुकानामध्ये देखील उधारीमुळे त्यांचे नुकसान होत होते. त्यामुळे त्यांनी गावातल्या स्वप्नील, सुरज आणि सुमित्रा यांना उधारी सामान देणे बंद केले होते.

यामुळे या सर्वांनी मिळून अविनाश यांचा अपमान करण्याची एक संधी सोडली नाही. सततचा मानसीक त्रास होत असल्याने अविनाश यांनी शेवटी जीवन संपवण्याचा टोकाचा निर्णय घेतला. पोलिस या प्रकरणी अधिक तपास करत आहेत.