Bachchu Kadu MLC election : महाराष्ट्राच्या राजकीय वर्तुळातून एक मोठी बातमी समोर येत आहे. प्रहार जनशक्ती पक्षाचे अध्यक्ष बच्चू कडू आज विधान परिषदेसाठी आपला उमेदवारी अर्ज दाखल करणार आहेत. बच्चू कडू हे उपमुख्यमंत्री एकनाथ शिंदे यांच्या शिवसेनेकडून ही निवडणूक लढवणार असल्याची माहिती विश्वसनीय सूत्रांनी दिली आहे.

सूत्रांच्या माहितीनुसार, बच्चू कडू हे 'प्रहार' हा राजकीय पक्ष शिवसेनेत विलीन करणार आहेत. मात्र 'प्रहार' ही सामाजिक संघटना कायम राहणार आहे. पुढील सहा महिन्यांत बच्चू कडू यांना शिवसेनेकडून मंत्रीपद दिले जाणार असल्याचेही सूत्रांकडून समजते. या संदर्भात एकनाथ शिंदे आणि बच्चू कडू यांच्यामध्ये बैठक पार पडली. शिवसेनेत बच्चू कडू यांना मोठी जबाबदारी दिली जाणार आहे. ज्या शिवसेनेतून बच्चू कडू यांनी आपल्या राजकीय प्रवासाला सुरुवात केली होती, त्याच शिवसेनेत आपला पक्ष विलीन करून ते आता शिवसेनेचे आमदार होणार आहेत. आज सकाळी ११ वाजेनंतर ते आपला उमेदवारी अर्ज दाखल करण्याची शक्यता आहे.

मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यामध्येही याबाबत रात्री बैठक झाली. शिंदे यांच्या शिवसेनेची बैठक सुरू असतानाच, एकनाथ शिंदे फडणवीसांच्या भेटीसाठी 'सागर' बंगल्यावर (किंवा वर्षावर) दाखल झाले. त्या वेळी दोघांमध्ये विधानपरिषदेच्या निवडणुकीसंदर्भात चर्चा झाल्याची माहिती मिळत आहे. ही भेट आटोपल्यानंतर एकनाथ शिंदे पुन्हा 'नंदनवन'वर परतले.

अर्ज भरण्याचा आज शेवटचा दिवस -

विधानपरिषदेच्या ९ जागांसाठी आज उमेदवारी अर्ज भरण्याचा शेवटचा दिवस आहे. विधानसभेच्या संख्याबळानुसार विधानपरिषद निवडणुकीत ९ जागांपैकी भाजप ५, अजित पवारांची राष्ट्रवादी १ आणि शिंदे यांची शिवसेना २ जागा लढवणार आहे; तर मविआ १ जागा लढवणार आहे. भाजपने उमेदवार जाहीर केले असले तरी, शिंदे यांची शिवसेना आणि राष्ट्रवादीकडून अद्याप उमेदवारांच्या नावांची अधिकृत घोषणा करण्यात आलेली नाही. दरम्यान, ठाकरे यांच्या शिवसेनेकडून अंबादास दानवे यांना उमेदवारी जाहीर करण्यात आली आहे.