माधव सावरगावे, संभाजीनगर

संभाजीनगरमध्ये उद्योजक संतोष लड्डा यांच्या घरावर दरोडा टाकणाऱ्या मुख्य आरोपीचा म्हणजे अमोल खोतकरचा पोलिसांनी एन्काऊंटर केला होता. पण अमोल खोतकर हा किती खतरनाक गुन्हेगार होता हे एका व्हिडिओतून समोर आले आहे. अमोल कोतकर हा आपल्या जवळ असले पिस्तुले साफ करतानाचा व्हिडिओ साम टीव्हीला पोलिसांकडून मिळाला आहे. पिस्तुले साफ करत असताना तो 'एक कोटी रुपये द्या किंवा सुपारी द्या, कोणालाही ठार करू शकतो.' असं बोलताना व्हिडीओमध्ये दिसत आहे.

अमोल खोतकर एकाच वेळेस तीन- तीन पिसूले वापरायचा. सोबतच हत्या करण्यासाठी किंवा गुन्हा करण्यासाठीची साधने त्याच्याजवळ होती. एक कोटी रुपयांत सुपारी घेतो आणि शंभर टक्के गॅरंटी असते, असं म्हणत या व्हिडिओमध्ये कुणीतरी अमोल कोतकरचे कौतुक करताना बोलत आहे. 'मर्डर ऑफ किंग', अशी त्याची ओळख करून देताना दिसत आहे.

उद्योजक संतोष लड्डा यांच्या घरावर दरोडा प्रकरणात एन्काऊंटरमध्ये मारला गेलेल्या अमोल खोतकरची बहीण रोहिणी बाबूराव खोतकरला गुन्हे शाखेच्या पथकाने सोमवारी रात्री अटक केली होती. तिच्याकडून पोलिसांनी सोन्याच्या दागिन्यांसह जिवंत काडतुसे जप्त केली होती. घरातील तुळशी वृंदावनाखालील जमिनीत तिने हातमोज्यामध्ये लपवलेले २२ तोळे सोन्याचे दागिने, ७ जिवंत काडतुसे पोलिसांनी जप्त केली.

संतोष लड्डा यांच्या बंगल्यात १५ मेच्या रात्री सहा दरोडेखोरांनी साडेपाच किलो सोने, ३२ किलो चांदी लुटली होती. या प्रकरणातगुन्हे शाखेने आतापर्यंत २१ आरोपींना अटक केली आहे. एपीआय रविकांत गच्चे यांनी २६ मे रोजी साजापूर रस्त्यावर अमोल खोतकरचे एन्काउंटर केले होते. या प्रकरणात आता पोलिसांनी अमोल खोतकरची बहीण रोहिणीला देखील अटक केली आहे. सुरूवातीला रोहिणी खोतकर भावाच्या एन्काऊंटर प्रकरणात पोलिसांवर गंभीर आरोप केले होते.

चौकशीत तिने पडेगाव येथील गॅरेजसमोर लावलेल्या कारच्या डिकीत चांदी लपवल्याचे सांगितले. त्यानंतर पोलिसांनी ३१ किलो चांदी जप्त केली होती. अमोलची मैत्रीण खुशीने रोहिणीकडे सोन्याचे दागिने असल्याचा जबाब पोलिसांना दिला होता. खोतकरचा मित्र आणि आरोपी सुरेश गंगणे आणि रोहिणीच्या एका मैत्रिणीनेदेखील दागिने तिच्याकडेच असल्याचे सांगितले होते. त्यावरून पोलिसांनी रोहिणीला चौकशीसाठी बोलावले होते. ती १८ जून रोजी मोबाइल बंद करून गोव्याला निघून गेली. त्यांनतर तिच्या अटकेसाठी पोलिसांची पथके रवाना केली होती. तिथेच पोलिसांनी तिला अटक केली.