Aurangabad News : महिलेच्या छेडछाड आणि विनयभंग प्रकरणी एसीपी विशाल ढुमे यांच्यावर निलंबनाची कारवाई करण्यात आली आहे. गृह विभागाकडून ही मोठी कारवाई करण्यात आली आहे. विशाल ढुमे यांच्यावर एका महिलेची छेड काढल्याप्रकरणी रविवारी गुन्हा दाखल करण्यात आला होता. दरम्यान त्यांना न्यायालयात हजर करण्यात आले असता 14 दिवसांची न्यायालयीन कोठडी सुनावण्यात आली होती. त्यानंतर आता त्यांच्यावर निलंबनाची कारवाई करण्यात आली आहे.

पोलीस दलातील एका मोठ्या अधिकाऱ्यानेच दारुच्या नशेत महिलेचा विनयभंग केल्याने शहरात एकच खळबळ उडाली. महिलेचा विनयभंग आणि महिलेच्या नातेवाईकांना मारहाण करणारे औरंगाबाद (Aurangabad) शहरातील एसीपी विशाल ढुमे त्या रात्री किती मद्यधुंद होते, याचा एक व्हिडिओ सोशल मिडियावर (Social Media) सध्या व्हायरल होत होता.

एका मित्राला घरी सोडण्याची विनंती करून, गाडीत बसल्यावर त्याच्या पत्नीचा ढुमे यांनी विनयभंग केला होता. एवढचं नाही तर पीडीत महिलेच्या पतीला बेदम मारहाण देखील केली होती. त्यानंतर पीडित महिलेच्या तक्रारीवरुन या प्रकरणी औरंगाबादच्या सीटी चौक पोलीस ठाण्यात गुन्हा दाखल करण्यात आला होता.

तर न्यायालयात हजर केले असता त्यांना 14 दिवसांची न्यायालयीन कोठडी सुनावण्यात आली होती. मात्र अवघ्या चार तासात त्यांना जामीन मिळाला होता. मात्र त्यांच्यावर गृहविभागाकडून कोणतेही कारवाई होत नसल्याने सर्वत्र संताप व्यक्त केला जात होता. त्यामुळे वाढता संताप पाहता अखेर गृहविभागाकडून विशाल ढुमे यांत्यांच्यावर निलंबनाची कारवाई करण्यात आली आहे.