सचिन बनसोडे, साम टीव्ही

भोंदूबाबा अशोक खरात प्रकरणात दिवसेंदिवस नवीन माहिती समोर येत आहे. भोंदू खरातने शेकडो महिलांचे लैंगिक शोषण केल्याचा दावा केला जात आहे. आतापर्यंत त्याच्या विरोधात ७ गुन्हे दाखल करण्यात आले आहेत. त्याने ५ जणांचा नरबळी दिल्याचा संशय कोर्टात व्यक्त करण्यात आला. त्याने ५ नरबळी मंदिराच्या आवारात दिल्याचाही संशय व्यक्त करण्यात येत आहे.

भोंदू खरातला मंगळवारी नाशिक पोलिसांनी कोर्टात हजर केले. खरातचे समोर येत असलेल्या धक्कादायक करारनाम्यामुळे त्याची पोलीस कोठडी ५ दिवसांनी वाढवली. कोर्टात खरातने अघोरी कृत्यासाठी नरबळी दिल्याचाही संशय व्यक्त करण्यात आला आहे. त्यामुळे पोलिसांकडून त्या दृष्टीने तपास सुरू आहे.

मिरगाव येथील त्याच्या आलिशान फार्महाऊसमध्ये पोलिसांनी बंदूक आणि काडतुसे हस्तगत केले आहेत. तर मिरगाव येथील शिवनिका संस्थानच्या आवारात असणाऱ्या ईशानेश्वर मंदिर आणि आमराईच्या परिसरात होमहवन आणि पूजाविधी करायचा. या परिसरातून नरबळी संशयाचे काही धागेदोरे पोलिसांना मिळतात का? हे पाहाणं महत्वाचं ठरणार आहे.

कोर्टात सरकारी वकील काय म्हणाले होते?

नाशिकमधील कोर्टात आणल्यानंतर सरकारी वकिलांनी त्याची कोठडी वाढवण्याची मागणी केली. कोर्टात युक्तिवाद करताना सरकारी वकील म्हणाले, 'खरातच्या घराच्या झडतीत राजमुद्रा सापडल्या. त्याने पिस्तुलाचा वापरून ५ जणांचा नरबळी दिल्याचा संशय आहे. त्याबाबतचे पुरावे देखील मिळाले आहेत. घरात विविध मालमत्तांची कागदपत्रे सापडली आहेत. ६७ वर्षांचा आरोपी ३० वर्षांच्या मुलीवर अत्याचार करताना एका व्हिडिओत दिसत आहे. त्याने पिस्तुलाचा वापर करून ५ जणांचा नरबळी दिल्याचा संशय आहे'.

खरातची सलग सातव्या दिवशी चौकशी

भोंदूबाबा अशोक खरातची SIT कडून सलग सातव्या दिवशी चौकशी सुरू आहे. त्याची गोपनीय ठिकाणी SIT कडून चौकशी सुरू आहे. SIT प्रमुख तेजस्वीनी सातपुते यांच्या उपस्थितीत ही चौकशी सुरू आहे. सकाळी १० वाजता चौकशीला सुरुवात झाली. नाशिक कोर्टाकडून कालच ५ दिवसांची पोलीस कोठडी मंजूर करण्यात आली. कोठडी वाढवताच पोलिसांनी दुसर्‍याच दिवशी चौकशीचा वेग वाढवला आहे. पोलिसांनी लैंगिक शोषणाचे विविध गुन्हे, आर्थिक व्यवहार आणि नेटवर्कवर लक्ष केंद्रित केलं आहे. SIT कडून सखोल चौकशी सुरूच आहे. खरात प्रकरणात अजून किती धक्कादायक खुलासे होणार, याकडं लक्ष लागलं आहे.