Nashik News : शिवसेनेच्या ठाकरे गटाचे खासदार संजय राऊत यांना मोठा दिलासा मिळाला आहे. नाशिकमध्ये दाखल झालेल्या गुन्ह्याप्रकरणी संजय राऊत यांना अटकपूर्व जामीन मंजूर करण्यात आला आहे. बेकायदा सरकारचे बेकायदा आदेश पाळू नका, असं वक्तव्य संजय राऊत यांनी नाशिकमधील पत्रकार परिषदेत केलं होतं.

संजय राऊत यांच्या वक्तव्यानंतर चिथावणीखोर वक्तव्य केल्याप्रकरणी मुंबई नाका पोलीस ठाण्यात राऊत यांच्या विरोधात कलम ५०५ अंतर्गत गुन्हा दाखल करण्यात आला होता. नाशिक जिल्हा सत्र न्यायालयाने या प्रकरणी संजय राऊत यांना अटकपूर्व जामीन मंजूर केला आहे. (Latest News Update)

काय म्हणाले होते संजय राऊत?

संजय राऊत यांनी नाशिकचे पालकमंत्री दादा भुसे राजकीय भूमिकेतून कार्यकर्ते व शिवसेना नेत्यांना त्रास देत आहेत असा आरोप केला होता. सर्वोच्च न्यायालयाने राज्यातील सरकार अवैध पद्धतीने सत्तेत आले आहे, असे निरीक्षण नोंदवल्याचंही त्यांनी म्हटलं होतं.

सरकारचे बेकायदा आदेश पाळू नका- संजय राऊत

राज्यातलं सरकार तीन महिन्यात जाणार असून राज्यातील प्रशासन आणि पोलिसांना माझे आवाहन आहे की, त्यांनी बेकायदा सरकारचे बेकायदा आदेश पाळू नका. बेकायदा सरकारचे बेकायदा आदेश जर पाळाल तर तुम्ही अडचणीत याल, तुमच्यावर खटले दाखल होतील, असं संजय राऊत यांनी म्हटलं होतं.