Summary -

• बीडमध्ये एसीबीने पोलिस अधिकाऱ्याविरोधात मोठी कारवाई केली

• चकलांबा पोलिस ठाण्याचे एपीआय संदिप पाटील आणि कॉन्स्टेबल सुरवसे यांना ताब्यात घेण्यात आले

• दोघांना ५० हजार रुपयांची लाच स्वीकारताना रंगेहाथ पकडलं

• वाळू माफियाकडून कारवाई टाळण्यासाठी ही लाच मागण्यात आल्याचे समोर

योगेश काशिद, बीड

बीडमध्ये लाचलुचपत प्रतिबंधक विभागाने मोठी कारवाई केली. पोलिस अधिकाऱ्याला लाच घेताना रंगेहाथ पकडण्यात आलं. हा पोलिस अधिकारी वाळू माफियांकडून लाच घेत होता. या घनटेमुळे बीडच्या पोलिस दलात खळबळ उडाली आहे. याप्रकरणी एसीबीने पोलिस अधिकारी आणि कॉन्स्टेबलला ताब्यात घेतलं असून त्यांची चौकशी सुरू आहे. दोघांविरोधात गुन्हा दाखल करण्यात आला आहे.

मिळालेल्या माहितीनुसार, बीडच्या गेवराई तालुक्यातील चकलांबा पोलीस ठाण्याचे प्रभारी एपीआय संदिप पाटील याच्यासह पोलिस कॉन्स्टेबल सुरवसे यांच्यावर एसीबीने कारवाई केली. या दोघांना ५० हजार रुपयांची लाच स्वीकारताना एसीबीने रंगेहात पकडले. एपीआय संदिप पाटील यांनी एका वाळु माफियाकडे ८० हजार रुपये मागितले होते. तडजोडअंती ६०००० रुपये देण्याचे ठरले. कारवाई टाळण्यासाठी वाळू माफियांकडून त्यांनी पैसे मागितले होते.

यामधील ५०००० रुपये पोलिस कॉन्स्टेबल सुरवसे याच्याकडे देण्यास संदिप पाटील याने सांगितले होते. ५० हजार रुपये स्वीकारताच पोलीस कॉन्स्टेबल सुरवसेसह संदिप पाटील यांना बीडच्या लाचलुचपत प्रतिबंधक विभागाने ताब्यात घेतले. चकलांबा पोलिस ठाण्यात दोन्ही पोलिसांविरोधात विरोधात गुन्हा दाखल करण्यात आला आहे. यादोघांची देखील एसीबीकडून कसून चौकशी सुरू आहे. या घटनेमुळे बीडमध्ये खळबळ उडाली.