>>संजय डफ

Nagpur News : माजी गृहमंत्री अनिल देशमुख यांचे नागपुरात राष्ट्रवादी काँग्रेसच्या कार्यकर्त्यांनी जोरदार स्वागत केले. ईडी आणि सीबीआय कुठलेही ठोस पुरावे सादर करू न शकल्याने सर्वोच्च न्यायालयाने माजी गृहमंत्री अनिल देशमुख यांना जामीन मंजूर केला आहे. जामीन मिळाल्यानंतर आता तब्बल २१ महिन्यांनंतर देशमुख नागपूरमध्ये दाखल झाले आहे. यावेळी राष्ट्रवादीतर्फे त्यांची भव्य मिरवणूक काढून जंगी स्वागत करण्यात आले.

अनिल देशमुख यांच्या सिव्हिल लाईन येथील निवासस्थानाबाहेर देशमुक यांच्या स्वागतासाठी शेकडो कार्यकर्त्यांनी गर्दी केली होती. यावेळी उत्साही कार्यकर्त्यांनी अनिल देशमुख यांच्यावर क्रेनच्या साह्याने फुलांचा वर्षाव करत त्यांना फुलांचा भला मोठा हार घातला. तसेच कार्यकर्त्यांकडून अनिल देशमुख यांची भव्य रॅली काढण्यात आली. (Latest Marathi News)

शिवसेनेकडूनही देशमुखांचं जंगी स्वागत

या रॅलीदरम्यान व्हेरायटी चौकात शिवसेनेच्या पदाधिकाऱ्यांनीही अनिल देशमुख यांचं स्वागत करत त्यांना भगवी शॉल दिली. तसेच उद्धव ठाकरे, आदित्य ठाकरे आणि अनिल देशमुख यांचे फोटो असलेले 'वारसा संघर्षाचा' असे पोस्टर्स हातात घेऊन शिवसैनिकांनी जोरदार घोषणाबाजी केली.

स्वागतासाठी शेकडो कार्यकर्त्यांची गर्दी

अनिल देशमुख २१ महिन्यानंतर नागपुरात त्यांच्या स्वगृही परतले आहेत. त्यामुळं त्यांच्या कार्यकर्त्यानी त्यांच्या स्वागतासाठी मोठी गर्दी केली होती. ढोल आणि फलक घेऊन कार्यकर्ते विदर्भातील वेगवेगळ्या ठिकाणांहून नागपूर विमानतळावर दाखल झाले होते.