पराग ढोबळे, साम टीव्ही

नागपुरात विधानसभा निवडणूक प्रचारादरम्यान माजी गृहमंत्री अनिल देशमुख यांच्यावरील झालेल्या हल्ल्यातील घटनाक्रम झाला नसल्याचा अहवाल नागपूर ग्रामीण पोलिसांनी कोर्टात सादर केला आहे. खात्रीलायक सूत्रांनी ही माहिती दिली आहे. या अहवालामुळे राजकीय वर्तुळात खळबळ उडाली आहे.

काय आहे प्रकरण?

अनिल देशमुख यांच्यावर १९ नोव्हेंबर २०२४ रोजी प्रचारादरम्यान हल्ला झाला होता. नागपूरहून परत येत असताना त्यांच्या वाहनावर दगड फेकून हल्ला झाल्याची तक्रार देण्यात आली होती. या घटनेचा अहवाल पाठवताना पोलिसांनी दिलेल्या रिपोर्टमध्ये हा एफआयआरमध्ये दिलेला घटनाक्रम झाला नसल्याचं असा दावा करण्यात आलाय.

त्यानंतर पोलिसांनी तपास करत नागपूर ग्रामीण पोलीसचे पोलीस अधीक्षक हर्ष पोद्दार यांनी यांच्या माध्यमातून तो अपघात कसा झाला होता असा रिपोर्टही तयार केला होता.

अनिल देशमुख यांना त्यावेळी नागपुरातील खासगी रुग्णालयात भरती करण्यात आलं होतं. त्यांच्या डोक्याला दुखापत झाल्याचं त्यावेळेस सांगण्यात आलं होतं. तत्कालीन पोलीस उपविभागीय अधिकारी यांची दोन दिवसांपूर्वीच बदली झाली होती. त्यांनीच हा अहवाल कोर्टात सादर केल्याची खात्रीलायक सूत्रांकडून माहिती पुढे येत आहे.

या अहवालामुळे राजकीय वर्तुळात उलटसुलट चर्चा सुरु झाली आहे. सत्ताधाऱ्यांकडूनही या प्रकरणावर निशाणा साधायला सुरुवात केलीये. मात्र, देशमुख यांच्या समर्थकांकडून या अहवालावर प्रश्नचिन्ह उपस्थित करण्यात येत आहे. या प्रकरणावर अद्याप माजी मंत्री अनिल देशमुख यांच्याकडून कोणतीही प्रतिक्रिया समोर आलेली नाही. या प्रकरणावर अनिल देशमुख काय प्रतिक्रिया देतील, याकडे साऱ्यांचं लक्ष लागलं आहे.