अक्षय शिंदे, साम टीव्ही

जालना : मुख्यमंत्री माझी लाडकी बहीण योजनेचे अर्ज भरणाऱ्या अंगणवाडी सेविकांना प्रति अर्ज 50 रुपये भत्ता देण्याचा निर्णय शासनाने घेतला होता.. परंतु अद्यापही अंगणवाडी सेविकांना 50 रुपये भत्ता मिळालेला नाही .यामुळे आता अंगणवाडी सेविका आक्रमक झाल्या असून शासनाने तीन ते चार दिवसांमध्ये 50 रुपये भत्ता अदा करावा नाहीतर आंदोलन करू असा इशारा अंगणवाडी सेविकांनी दिला आहे.

जालना जिल्ह्यात जवळपास दोन लाख लाडक्या बहिणींचे अर्ज अंगणवाडी सेविकांनी भरले असून अंगणवाडी सेविकांनी तळमळीने काम करून लाडकी बहीण योजना राबविल्यामुळेच महायुतीला भरघोस यश मिळाल्याच देखील अंगणवाडी सेविकांचं म्हणणं आहे. दरम्यान या अनुदानाबाबतचा प्रस्ताव प्रशासनाकडून शासनाकडे सादर करण्यात आला असून शासन स्तरावरून अनुदानाचे लवकरच वितरण केले जाणार असल्याची माहिती महिला व बाल विकास अधिकारी कोमल कोरे यांनी दिली आहे.

अंगणवाडी सेविका आंदोलनाच्या तयारीत

महायुती सरकारने निवडणुकीपूर्वी लाडकी बहीण योजनेसाठी अंगणवाडी सेविकांना 50 रुपये प्रति अर्ज मानधन देणार असल्याची घोषणा केली होती. त्यानंतर अंगणवाडी सेविकांनी जालना जिल्ह्यात जवळपास दीड लाखाहून अधिक अर्ज लाडक्या बहिणीचे भरले आहे. मात्र निवडणुका होऊन देखील अद्यापही अंगणवाडी सेविकांच्या खात्यात पन्नास रुपये अर्ज प्रमाणे मानधन जमा झाले नसल्याने आता अंगणवाडी सेविका आक्रमक झाल्या असून येणाऱ्या तीन ते चार दिवसात खात्यावर मानधन जमा न झाल्यास आंदोलन करणार असल्याचा इशारा अंगणवाडी सेविकांनी दिला आहे.

महायुतीला भरघोस यश आमच्यामुळे

विधानसभा निवडणुकीमध्ये लाडकी बहीण योजना गेमचेंजर ठरल्याच बोलल जात असून लाडकी बहीण योजनेमुळेच महाराष्ट्रात महायुतीला भरघोस यश मिळाल्याच देखील बोलल जात आहे. अंगणवाडी सेविकांनी तळमळीने काम करून लाडकी बहीण योजना राबविल्यामुळेच महायुतीला भरघोस यश मिळाल्याचं अंगणवाडी सेविका साजदा बेगम यांनी बोलून दाखवला आहे.

तालुकानिहाय अंगणवाडी सेविकांनी भरलेले अर्ज

जालना शहर -28716

जालना ग्रामीण - 24330

अंबड- 17909

बदनापूर - 11722

परतुर- 9762

घनसावंगी- 18157

भोकरदन-16193

जाफराबाद-17011

मंठा-11149