मावळ : अंदर मावळ मध्ये रस्त्यांची अवस्था अतिशय दयनीय झाली आहे. रस्त्यांवर पडलेल्या खड्ड्यांमुळे रस्त्याची चाळण झाली असून या खड्ड्यांमध्ये गुडघ्यावर पाणी साचले आहे. या खड्ड्यातून वाहन चालविताना मोठी कसरत करावी लागत असते. या सर्व परिस्थितीमुळे ग्रामस्थांनी आज रस्त्यांवरील खड्ड्यात वृक्षारोपण करत आंदोलन केले आहे. 

मावळच्या टाकवे ते राजापुरी दरम्यानचा मुख्य रस्ता खड्ड्यांनी भरलेला असून मोठ्या खड्ड्यांमुळे वाहन चालकांना जीव मुठीत घेऊन वाहने चालवावी लागतात. तर २०१६ मध्ये हा रस्ता तयार केला; तेव्हापासून आतापर्यंत कधीही या रोडची दुरुस्ती केली गेली नाही. या रस्त्याचं डांबरीकरण करून १८ फुटी रस्ता करावा; अशी ग्रामस्थांची मागणी आहे. मात्र प्रशासनाकडून याकडे दुर्लक्ष करण्यात येत आहे. 

मोठ्या खड्ड्यांमुळे त्रास 

पावसाळ्यात हे खड्डे पाण्याने भरल्यामुळे अपघाताचे प्रमाण वाढले असून अनेक गंभीर घटना याआधी घडल्या आहेत. रस्त्याची दुरावस्था केवळ वाहन चालकापुरतीच मर्यादित नसून शालेय विद्यार्थी, आजारी रुग्ण आणि गर्भवती महिलांना देखील याचा नाहक त्रास सहन करावा लागत आहे. गेल्या अनेक महिन्यापासून ही समस्या असून देखील प्रशासन कोणतेही ठोस पाऊल उचलून रस्ता दुरुस्त करत नाही.

खड्ड्यात वृक्षारोपण करत आंदोलन 

दरम्यान प्रशासनाकडे वारंवार तक्रारी करूनही रस्त्याच्या दुरुस्तीकडे दुर्लक्ष झाल्याने अखेर स्थानिक नागरिकांनी अनोख्या पद्धतीने खड्ड्यांमध्ये वृक्षारोपण करून प्रशासनाचा निषेध करत लक्ष वेधले आहे. या रस्त्यावर एखादा बळी गेल्यानंतर प्रशासनाला जाग येईल का? असा सवाल देखील नागरिक विचारत आहे. दरम्यान रस्त्याची दुरुस्ती लवकरात लवकर झाली नाही, तर आणखी तीव्र आंदोलन केले जाईल; असा इशारा स्थानिक नागरिकांनी प्रशासनाला दिला आहे.