अमरावतीमध्ये आज प्रहार पक्षाचे नेते बच्चू कडू (Bacchu Kadu) चांगलेच आक्रमक झाल्याचे पाहायला मिळाले. सभेसाठी सायन्स कोर मैदानाच्या (Science Core Ground) परवानगीवरून बच्चू कडू प्रचंड आक्रमक झालेत. 'परवानगी आम्हाला, मग सभा अमित शहा यांची कशी?', असा सवाल करत त्यांनी मैदनाच्या गेटवरच ठिय्या मांडला. यावेळी बच्चू कडू यांनी 'मला अटक करण्याचा प्लॅन आखला जातोय.', असा आरोप सरकारवर केला आहे.

बच्चू कडू यांनी माध्यमांशी संवाद साधताना सांगितले की, 'या मैदानाची परवानगी आम्हाला मिळाली आहे. मैदानासाठी ५ तारखेला अर्ज केला होता. आम्ही १८ तारखेला पैसे भरले होते. याची कागदपत्रे आणि पावती आमच्याकडे आहेत. २३ आणि २४ तारखेसाठी परवानगी देण्यात आली होती. परवानगी असतानाही मैदान सोडण्यासाठी दबाब केला जात आहे. पोलिस आम्हाला मारायची भाषा करत आहेत.', असा आरोप त्यांनी केला.

तसंच, 'परवानगी असताना आम्हाला का रोखलं?', असा सवाल बच्चू कडू यांनी केले आहे. 'आम्ही वाद होऊ नये म्हणून समोर आलो नाही. आता समोर आलो तर पोलिस आम्हाला आडवत आहेत. आम्ही निवडणूक आयोगाकडे तक्रार केली आहे आणि पुन्हा करणार आहे. परवानगी असताना कोण कायदाभंग करत आहे. न्यायालयावर आम्हाला विश्वास राहिला नाही. आमची परवानगी असताना ती डावलली जात आहे. मला अटक करण्याचा प्लॅन आखला जात आहे.' असा आरोप बच्चू कडू यांनी केला आहे.

, उद्या १ लाख लोकं आणून इथेच आंदोलन करणार असल्याचा इशारा बच्चू कडू यांनी दिला आहे. 'रितसर परवानगी असताना आम्हाला का आडवलं गेलं. परवानगी असताना सभा रद्द का करायची?'असा सवाल देखील त्यांनी उपस्थित केला आहे. 'पोलिस भाजप कार्यकर्त्यांसारखे वागत आहेत असे म्हणत अमित शहांनी कायदा तोडायला सांगितला का?', असा सवाल बच्चू कडू यांनी पोलिसांना केला आहे. त्याचसोबत कायद्यापेक्षा माणसं मोठी नाहीत, असे म्हणत परवानगी आम्हाला मिळाली असल्याचे त्यांनी सांगितले.