अमर घटारे 
अमरावती : स्पा सेंटर चालविण्याच्या नावाखाली तेथे अवैध धंदा सुरु होता. यानंतर माहिती मिळाल्यानंतर अमरावती शहरातील युनिकॉन स्पा सेंटरवर शहर गुन्हे शाखा युनिट-२ कडून धडक कारवाई करण्यात आली. या कारवाईत स्पा सेंटरमधील तीन ग्राहकांना अटक करण्यात आली आहे. तर सहा तरुणींना ताब्यात घेण्यात आले आहे. या कारवाईमुळे शहरात खळबळ उडाली आहे. 

अमरावती शहर गुन्हे शाखेच्या युनिट २ ने मिळालेल्या गुप्त माहितीनुसार ही धडक कार्यवाही करण्यात आली. सदर कारवाई पोलीस निरीक्षक संदीप चव्हाण यांच्या नेतृत्वाखाली पार पडली. या कारवाईमुळे शहरातील बोगस स्पा सेंटर्सवर पोलिसांकडून होत असलेल्या कारवाईचा धसका दिसून येत आहे. तर पोलिसांकडून या प्रकरणी आणखी सर्च ऑपरेशन राबविण्यात येणार आहे. 

स्पा सेंटर मालकाविरोधात गुन्हा दाखल 

पोलिसांनी केलेल्या छापेमारीत स्पा सेंटरमधून ताब्यात घेतलेल्या संबंधित तरुणी या दिल्ली, मुंबई व संभाजीनगर येथील असल्याचे उघड झाले आहे. या स्पा सेंटरचे मालक सोमेश्वर येवते मुंबईमध्ये राहत असून त्याच्या विरोधात गुन्हा दाखल करण्यात आला आहे. तसेच स्पा सेंटरवरील व्यवस्थापक संजय भरतसिंग राजपूत याला देखील पोलिसांनी ताब्यात घेतले आहे. या प्रकरणी पोलिसांकडून अधिक तपास सुरु आहे. 

अमरावतीच्या मोर्शीतून १३ लाखांचा अवैध गुटखा जप्त
अमरावती ग्रामीणच्या स्थानिक गुन्हे शाखेने मोठी कारवाई करत १३ लाख २१ हजार रुपयांचा अवैध गुटखा जप्त केला आहे. स्थानिक गुन्हे शाखेचे पथक मोर्शी पोलीस स्टेशन हद्दीत पेट्रोलिंग करत असताना त्यांना गुप्त माहिती मिळाली. काळ्या रंगाच्या कारमधून महाराष्ट्र शासनाने प्रतिबंधित केलेला गुटखा अवैधरित्या वाहतूक करून आणला जाणार आहे. यानंतर पोलिसांनी माळू नंदी पुलाजवळ सापळा लावला. गाडी आल्यानंतर पोलिसांनी तिची तपासणी केली असता कारमध्ये सुगंधी गुटखा आणि तंबाखू असा एकूण ३ लाख ७१ हजार २५० रुपये किमतीचा मुद्देमाल आढळून आला.