अमर घटारे 

अमरावती : खरीप हंगाम तोंडावर असल्याने कापूस बियाण्यांची खरेदीची लगबग सुरु झाली आहे. अशात प्रतिबंधित कापूस बियाणे देखील विक्रीसाठी आणले जात आहेत. अशात अमरावतीत ट्रॅव्हल्समधून प्रतिबंधित एचटी बीटी कपाशी बियाण्याची तस्करी करण्यात येत असल्याचा प्रकार समोर आला आहे. गुजरातच्या अहमदाबादमधून हे प्रतिबंधित एचटीबीटी बियाणे येत होते. मात्र कृषी विभागाने कारवाई करत हा मुद्देमाल जप्त करण्यात आला आहे.  

राज्यात अवकाळी पावसानंतर अनेक भागात मान्सून दाखल झाला आहे. यामुळे शेती मशागत करून पेरणीसाठीच्या तयारीला शेतकरी लागला आहे. बाजारात देखील कापूस, मका, सोयाबीनची बियाणे विक्रीसाठी दाखल झाले आहेत. दरम्यान राज्यात काही बियाणे प्रतिबंधीत असताना देखील त्याची चोरून तस्करी करत विक्री करण्यात येत असते. या अनुषंगाने कृषी विभाग सजग असून प्रतिबंधित कापूस बियाणे विरोधात कारवाई करत आहे. 

अहमदाबादमधून बियाणे तस्करी 

खरीप हंगाम तोंडावर असताना अमरावती- नागपूर राष्ट्रीय महामार्गावर वेलकम पॉईट चौकामध्ये गुजरातच्या अहमदाबादमधून एका ट्रॅव्हल्समध्ये प्रतिबंधित असलेली एचटीबीटी कपाशी बियाण्याची तस्करी होत होती. याबाबत माहिती मिळाल्यानंतर विभागीय कृषी सहसंचालक विभागाच्या भरारी पथकाने कारवाई केली असून सर्व बियाणांचे पाकीट जप्त केले आहेत. 

२५ लाख रुपयांचा माल जप्त 

दरम्यान कृषी विभागाने कारवाई दरम्यान तपासणी करत ट्रॅव्हल्समध्ये शासन मान्यता नसलेले अनधिकृत एचटीबीटी बियाण्याचा एकूण ५० पांढरे कट्टे प्रति कट्ट्यात ५० पाकीट प्रमाणे २५०० पाकिटे व प्रिंटिंग केलेले चार कट्टे जप्त केले आहेत. ज्याची अंदाजीत रक्कम २५ लाख रुपयांच्या वर आहे. हा सर्व साठा जप्त करण्यात आला आहे. मात्र कृषी विभागाने केलेली हि कारवाई राज्यातील सर्वात मोठी कारवाई मानली जात आहे.