अमोल घाटरे, अमरावती

अमरावती शहरातील कठोरा रोड परिसरात काल रात्री फिल्मी स्टाईलने सोनारावर दरोडा टाकण्यात आल्याची धक्कादायक घटना घडली. या घटनेत अंदाजे ७०० ते ८०० ग्रॅम सोने आणि १ लाख ७० हजार रुपये रोख रक्कम लंपास करण्यात आली. या घटनेप्रकरणी पोलिसांत तक्रार दाखल करण्यात आली असून पोलीस या घटनेचा शोध घेत आहेत. तसेच या दरोड्यामुळे परिसरात भीतीदायक वातावरण निर्माण झाले आहे.

मिळालेल्या माहितीनुसार, सुमित्रा ज्वेलर्सचे संचालक सुशांत शेरेकर हे शुक्रवारी रात्री सुमारे ९.१५ वाजता दुकान बंद करून घरी जात होते. दुकानापासून अवघ्या २०० मीटर अंतरावर असलेल्या बालाजी नगर येथे त्यांचे वास्तव्य आहे. यावेळी काळ्या रंगाची चारचाकी गाडी त्यांच्या जवळ येऊन त्यांच्या वाहनाला कट मारत त्यांना खाली पाडण्यात आले.

यानंतर गाडीतून उतरलेल्या ३ ते ४ आरोपींच्या टोळीने चाकूचा धाक दाखवत त्यांच्या जवळील बॅग हिसकावून नेली.त्या बॅगेत अंदाजे ७०० ते ८०० ग्रॅम सोने तसेच १ लाख ७० हजार रुपये रोख रक्कम असल्याची माहिती आहे.

ही घटना गाडगे नगर पोलीस स्टेशन हद्दीत घडली. माहिती मिळताच पोलिसांनी घटनास्थळी धाव घेतली असून परिसरातील सीसीटीव्ही कॅमेऱ्यांची तपासणी सुरू आहे. आरोपींचा शोध सुरू असून या घटनेमुळे सराफा व्यावसायिकांमध्ये भीतीचे वातावरण निर्माण झाले आहे.