अमर गटारे , अमरावती प्रतिनिधी

Amravati road accident family killed Varud Morshi highway : अमरावती जिल्ह्यातील वरूड ते मोर्शी राष्ट्रीय महामार्गावर खडका फाट्याजवळ एक हृदयद्रावक अपघात घडला आहे. या अपघातात एकाच कुटुंबातील तिघांचा मृत्यू झाल्याने परिसरात शोककळा पसरली आहे. समाधान नांदे, किरण नांदे आणि तीन वर्षीय चिमुकली दिया नांदे या तिघांचा या भीषण अपघातात मृत्यू झाला आहे. तर गोपाळ नांदे हे गंभीर जखमी झाले असून सुदैवाने त्यांचा जीव वाचला आहे.

नांदे कुटुंबातील हे चौघेही नागपूर येथून एका लग्न समारंभासाठी जात असताना, वरूड तालुक्यातील खडका फाट्याजवळ त्यांच्या वाहनाने रस्त्याच्या कडेला असलेल्या झाडाला जोरदार धडक दिली. अपघातातील कुटुंब हे विनायक कॉलनी, कामठी खैरी, जि. नागपूर येथील रहिवासी असल्याची माहिती समोर आली आहे. या भीषण अपघातामुळे नांदे कुटुंब पूर्णतः उद्ध्वस्त झाले असून, सर्वत्र हळहळ व्यक्त होत आहे.

मिळालेल्या माहितीनुसार, चालकाचे नियंत्रण सुटल्यामुळे गाडी थेट रस्त्याच्या कडेला असलेल्या झाडावर जाऊन धडकली असावी, असा प्राथमिक अंदाज वर्तवण्यात येत आहे. अपघात इतका भीषण होता की वाहनाचा चक्काचूर झाला. आवाज ऐकताच परिसरातील नागरिकांनी तात्काळ घटनास्थळी धाव घेत जखमींना बाहेर काढले आणि उपचारासाठी रुग्णालयात हलवले.

गंभीर जखमी असलेल्या गोपाळ नांदे यांच्यावर स्थानिक ग्रामीण रुग्णालयात प्राथमिक उपचार करून पुढील उपचारासाठी अमरावतीला हलवण्यात आले आहे. त्यांची प्रकृती चिंताजनक असल्याचे सांगण्यात येत आहे. घटनेची माहिती मिळताच पोलिसांनी घटनास्थळी धाव घेतली. पोलिसांनी घटनास्थळाचा पंचनामा केला असून, याप्रकरणी अपघाती मृत्यूची नोंद करण्याची प्रक्रिया सुरू आहे.