अंबरनाथ : अंबरनाथमध्ये शेतकऱ्यांनी डोंबिवल– बदलापूर पाईपलाईन रोड या राज्य महामार्गाची (Amabarnath) एक मार्गिका बंद केली आहे. १९७२ साली झालेल्या भूसंपादनात एमआयडीसीने एक जागा संपादित केल्याचे दाखवून दुसऱ्याच जागेवर रस्ता आणि पाईपलाईन टाकली. त्यामुळं दोन्ही जागा मागील ५० वर्षांपासून अडकून पडल्याचे सांगत (Farmer) शेतकरी आक्रमक झाले आहेत. (Tajya Batmya)

निव्वळ कागदी चूक सुधारण्यासाठी एमआयडीसीने मागील ५० वर्षात स्वारस्य दाखवले नाही; असा आरोप करत शेतकऱ्यांनी या राज्य महामार्गावर आंदोलन करण्याचा इशारा दिला होता. त्यानंतरही एमआयडीसीकडून कोणतीही हालचाल न झाल्यामुळे अखेर आज वसार गावातील शेतकऱ्यांनी डोंबिवली-बदलापूर राज्य महामार्गाची एक मार्गिका बंद केली.

दरम्यान, शेतकऱ्यांकडून हा रस्ता बंद केला जात असताना या ठिकाणी एमआयडीसी अधिकारी आणि पोलिसही उपस्थित होते. याबाबत एमआयडीसी अधिकाऱ्यांना विचारलं असता आम्ही या प्रश्नाबाबत आमच्या वरिष्ठ कार्यालयाला कळवले असून लवकरात लवकर या प्रश्नावर तोडगा काढला जाईल; अशी प्रतिक्रिया उपअभियंता विजय शेलार यांनी दिली.