अमर घटारे, साम टीव्ही

अमरावीत शहरातील जिल्हा सामान्य रुग्णालय येथील अपघात कक्षात भटक्या कुत्र्यांचा मुक्तपणे वावर होत असल्याची धक्कादायक बाब समोर आलीये. या प्रकारामुळे रुग्णांच्या सुरक्षिततेवर गंभीर प्रश्नचिन्ह निर्माण झाले आहे. रुग्णालय प्रशासनाच्या व्यवस्थेवरही टीका होऊ लागली आहे.

अमरावतीतील जिल्हा रुग्णालयातील अपघात कक्ष २४ तास कार्यरत असतो. या कक्षेत अपघातग्रस्त, गंभीर अवस्थेतील रुग्ण, विषप्राशन केलेले रुग्ण उपचारासाठी दाखल होतात. मात्र अशा संवेदनशील विभागातच कुत्रे बेधडक फिरताना दिसताहेत. यामुळे नागरिकांमध्ये संताप व्यक्त होत आहे.

काही रुग्णांवर उपचार सुरू असतानाच एक भटका कुत्रा बेडजवळ फिरतानाचा व्हिडिओ समोर आला. भटक्या कुत्र्यांमुळे रुग्ण आणि त्यांच्या नातेवाईकांमध्ये भीतीचे वातावरण निर्माण झालीये. जखमी रुग्णांसाठी अशा अस्वच्छ वातावरणामुळे संसर्गाचा धोका अधिक वाढण्याची शक्यता आहे. रुग्णालयाच्या प्रवेशद्वारावर नियंत्रण नसल्याने मोकाट जनावरांचा वावर वाढला आहे. स्वच्छतेच्या बाबतीतही गंभीर त्रुटी आहेत.

या प्रकाराची दखल घेऊन रुग्णालय प्रशासनाने तातडीने उपाययोजना करण्याची गरज नागरिकांकडून व्यक्त होत आहे. अपघात कक्षासह संपूर्ण रुग्णालय परिसरात सुरक्षा व्यवस्था कडक करणे आणि भटक्या प्राण्यांचा प्रवेश रोखणे अत्यावश्यक असल्याचे बोलले जात आहे.