सचिन कदम, अलिबाग

Alibaug ZP Election Win Eknath Shinde Shivsena Sachin Raul Attack News राज्यात ७ फेब्रुवारी रोजी जिल्हा परिषद निवडणुका पार पडल्या. या निवडणुकांचे निकाल काल म्हणजेच ९ फेब्रुवारी रोजी जाहीर झाले. या निवडणुकीचा निकाल देखील महायुतीच्या बाजूने जास्त मतांनी लागला. कोणाचा विजय झाला तर कोणाला हार पत्करावी लागली. या निवडणुकांच्या निकालानंतर अलिबागमध्ये विजयी उमेदवाराच्या गाडीवर हल्ला करण्याचा प्रकार समोर आला आहे. याप्रकरणी ठाकरे गटाच्या जिल्हा प्रमुखासह १० ते १२ कार्यकर्त्यांवर गुन्हा दाखल करण्यात आला आहे.

मिळालेल्या माहितीनुसार, अलिबाग येथील शिंदेंच्या शिवसेनेचे विजयी उमेदवार सचिन राऊळ यांच्या विजयानंतर कार्यकर्ते या गाडीतून देवदर्शनासाठी जात होते. या प्रवासादरम्यान ठाकरे गटाच्या कार्यकर्त्यांनी त्यांची गाडी अडवली. आणि लाठ्याकाठ्यांनी मारहाण केली. गाडीच्या काचा फोडल्या आणि कार्यकर्त्यांना देखील क्रूरपणे मारहाण केली.

याप्रकरणी रेवदंडा पोलिस ठाण्यात तक्रार दाखल करण्यात आली असून पोलिस या घटनेचा तपास करीत आहेत. शिवसेना ठाकरे गटाचे जिल्हा प्रमुख सुरेंद्र म्हात्रे यांच्यासह 10 ते 12 जणांविरोधात रेवदंडा पोलिस ठाण्यात गुन्हा दाखल करण्यात आला आहे. दरम्यान या घटनेनंतर परिसरात खळबळ उडाली आहे.