अक्षय गवळी, साम टीव्ही अकोला

Akola Police Death News

कुलरमध्ये पाणी भरताना शॉक लागून एका पोलीस कर्मचाऱ्याचा मृत्यू झाल्याची दुर्देवी घटना अकोला शहरातील अंबिकानगर परिसरात घडली. गणेश रामराव सोनोने (५७, रा. अंबिका नगर, मलकापूर) असं मृत पोलीस कर्मचाऱ्याचं नाव आहे. या घटनेमुळे अकोला पोलीस दलातून हळहळ व्यक्त होत आहे.

मिळालेल्या माहितीनुसार, गणेश रामराव सोनोने अकोला शहरातील (Akola News) खदान पोलीस स्टेशनच्या हद्दीत येणाऱ्या मलकापूर स्थित अंबिका नगरमध्ये राहत होते. उकाडा जाणवत असल्याने मंगळवारी (ता. ३०) सकाळी ते नेहमीप्रमाणे कुलरमध्ये पाणी भरत होते.

घरातील कामकाज आटोपून ते ड्युटीवर (Police) जाणार होते. परंतु त्यापूर्वीच सोनोने यांच्यावर काळाने घाला घातला. कुलरमध्ये पाणी भरताना भिंतीवरील उघड्या वायरल त्यांच्या हाताचा स्पर्श झाला. त्यामुळे सोनोने यांना विजेचा जोरदार धक्का लागला.

ही बाब कुटुंबियांच्या लक्षात येताच त्यांनी तातडीने सोनोने यांना उपचारासाठी रुग्णालयात दाखल केले. परंतु उपचारादरम्यान त्यांचा मृत्यू झाला. सोनोने हे ९ महिन्यांनंतर पोलिस सेवेतून सेवानिवृत्त होणार होते. त्यांच्या निधनाने मोठी हळहळ व्यक्त होत आहे.

कुलरचा शॉक चिमुकलीचा मृत्यू

अगदी आठवडाभरापूर्वी जळगाव जिल्ह्यातही अशाच प्रकारची घटना घडली होती. दुपारच्या सुमारास कुलर सुरु करताना विजेचा जोरदार झटका बसून १२ वर्षीय मुलीचा मृत्यू झाला होता. ही घटना किनोद येथे घडली होती. झाल्याची घटना जळगाव तालुक्यातील किनोद या गावी घडली. याप्रकरणी जळगाव तालुका पोलीस स्टेशनला अकस्मात मृत्यूची नोंद करण्यात आली.