अक्षय गवळी 

अकोला : अकोल्यात जिल्हा नियोजन समितीच्या बैठकीवर ठाकरे गटाचे आमदार नितीन देशमुखांनी बहिष्कार टाकला. आमदार देशमुख हे डीपीडीसीच्या बैठकीत पिक विमा मुद्द्यावरुन चांगलेचं आक्रमक झाले अन् बैठक मध्येच सोडत सभागृहाच्या बाहेर पडले.

एचडीएफसी अर्गो कंपनीने २०२३-२४ मधील खरीप आणि रब्बी हंगामासाठी (Crop Insurance) पीक विमा योजनेसाठी कागदपत्रे कृषी विभागाला मागणी करूनही सादर केली नाही. पीक नुकसान झालेल्या शेतकऱ्यांची लदावा यादी, सर्वेक्षण झालेली यादी, पात्र आणि अपात्र यांची यादी, खरीप आणि रब्बी पंचनामे प्रती इतर दस्ताऐवज कंपनीने कृषी विभागाला सादर केले नाहीत. यामूळे बाळापूर तालुक्यातील ७ हजार ५५६ शेतकऱ्यांना नुकसान भरपाईचा योग्य परतावा मिळाला नाही. यामुळे सदर कंपनीवर बाळापूर पोलिसांत फसवणुकीचा गुन्हा दाखल झाला आहे. याच मुद्द्यावरून आमदार देशमुख (Nitin Deshmukh) हे आक्रमक झाले होते. 

दरम्यान (Akola) अकोला जिल्ह्याची डीपीडीसीची बैठक होती. या बैठकीत पालकमंत्री विखे पाटील हे अकोल्यात दाखल असलेल्या विमा कंपनीवर फसवणुकीचे गुन्हे प्रकरणावर काहीही बोलायला तयार नाही. पोलिस अधिक्षक देखील बैठकीत गप्प आहे. त्यामुळे डीपीडीसी बैठकीवर बहिष्कार टाकत असल्याचे आमदार देशमुख यांनी सांगितले. विमा कंपनीच्या प्रतिनिधींवर फसवणुकीचे गुन्हे आहेत. तरीही पालकमंत्री चौकशीचे आदेश देत नाहीत. यामुळे बैठकीतून बाहेर जावं लागलं असल्याचे आमदार देशमुख यांनी सांगितले.