अक्षय गवळी, अकोला प्रतिनिधी

अकोला जिल्ह्यातील अकोट तालूक्यातल्या शेतकऱ्यांना अतिवृष्टीच्या तूटपंजी मदत खात्यावर जमा झाली आहे. दिनोडा, नरोडा, कावसा येथील शेतकऱ्यांच्या माथी फक्त ३ रुपये, ५रुपये ,८रुपये , २१ रूपयांचे मदतीचे धनादेश मारण्यात आले आहेत. 'साम टीव्हीने' हा विषय उचलून धरल्यानंतर सरकार आणि प्रशासन हादरलं आहे. यावरून आता सारवासारव करणाऱ्या जिल्हा प्रशासनानं कुणालाच हजाराच्या खाली पैसे मिळाले नसल्याचा दावा केला आहे. अत्यल्प मदत मिळालेल्या मातीतील एका टप्प्याचे असल्याचं अकोल्याच्या जिल्हाधिकाऱ्यांनी म्हटलं आहे.

अतिवृष्टीच्या 'अस्मानी' संकटात सापडलेला अकोला जिल्ह्यातील शेतकरी आता सरकारी व्यवस्थेच्या संवेदनाशुन्य 'सुल्तानी' संकटात सापडला आहे . यातूनच अकोला जिल्ह्यातील दिनोडा गावातील शेतकऱ्यांना फक्त ३ रुपये, ५रुपये ,८रुपये , २१ रूपयांचे मदतीचे धनादेश देण्यात आले. अशीच परिस्थिती लगतच्या कावसा, मरोडा आणि इतर गावातील शेतकऱ्यांबाबत झाली आहे. सरकार आणि प्रशासनानं यातून आपली थट्टा केल्याची भावना शेतकऱ्यांमध्ये आहे. ही मदत तुटपुंजी व अपमानास्पद असल्याचं सांगत दोन दिवसांपूर्वी हे धनादेश या शेतकऱ्यांनी जिल्हाधिकाऱ्यांकडे परत केले होते.

'साम टीव्ही'ने या विषयावर आवाज उठवल्यानंतर सरकार आणि त्यांची कुंभकर्णी झोपेत असलेली यंत्रणा जागी झाली आहे. मग सुरू झाला बातम्यांना खोटं ठरवण्यासाठीचा आटापिटा. यात सरकारच्या माहिती आणि जनसंपर्क विभागाच्या अधिकृत संकेतस्थळावर कमी रकमेचा धनादेश मिळालेल्या संदीप घुगे या शेतकऱ्यांने विम्यासाठी नोंदणी न केल्याची खोटी बातमी दिली आहे. अकोल्याच्या जिल्हाधिकारी वर्षा मिना यांनी असं काही झालं नसल्याचा दावा करीत प्रशासनाची चुक झाकण्याचा प्रयत्न केला.

अतिवृष्टीने लाखोंचं नुकसान झालेल्या शेतकऱ्यांना आपण किमान १००४ रूपयांची मदत केल्याचा दावा जिल्हा प्रशासनानं केला आहे. हा दावा अत्यंत असंवेदनशीलपणाचा आहे. काँग्रेसने या एकंदरीत या सर्व प्रकारावर जोरदार टीका केली आहे. सरकार आणि त्यांचं प्रशासन हे कागदी घोडे नाचवण्यात धन्यता मानतं आहे. लाखोंचं नुकसान होऊन शेतकऱ्यांना एक आकडी, दोन आकडी मदतीचे धनादेश देणारी यंत्रणा ही अत्यंत निर्ढावलेली अन तेव्हढीच असंवेदनशील म्हणावी लागेल.