समुद्रातील मोंथाचं संकट जरी दूर झालं असलं तरी हवामान खात्याने अंदमान आणि निकोबार बेटांसाठी 'सायक्लोन अलर्ट' जारी केला आहे. बंगालच्या उपसागरावर तयार होणारी ही नवीन प्रणाली ४ नोव्हेंबरपासून चक्रीवादळात रूपांतरित होणार असल्याचंही हवामान विभागाने म्हटलं आहे. या नव्या वादळामुळे विश्रांती घेतलेल्या पावसाची राज्यासह इतर ठिकाणी हजेरी लागणार असल्याची चिन्ह दिसत आहेत.

राज्यात आज कोकण, मध्य महाराष्ट्र, मराठवाड्यात तुरळक ठिकाणी विजांसह हलक्या पावसाची शक्यता आहे. उर्वरित राज्यात ढगाळ आकाशासह कमाल आणि किमान तापमानात चढ-उतार होण्याचा अंदाज हवामान विभागाने वर्तविला आहे. काल म्हणजेच सोमवारी सकाळपर्यंतच्या २४ तासांमध्ये राज्यात पावसाच्या हलक्या ते जोरदार सरी कोसळल्या. कोकणातील रायगड जिल्ह्यात पावसाचा जोर अधिक होता.

आज मुंबई, ठाणे , पालघर, कोकणातील रत्नागिरी, सिंधुदुर्ग, मध्य महाराष्ट्रातील अहिल्यानगर, पुणे, सातारा, सांगली, सोलापूर, कोल्हापूर, मराठवाड्यातील बीड, हिंगोली, धाराशिव, लातूर, नांदेड या जिल्ह्यांत विजांसह हलक्या पावसाचा अंदाज आहे. उर्वरित राज्यात ढगाळ आकाशासह कमाल आणि किमान तापमानात चढ उतार होण्याची शक्यता कायम असल्याचे हवामान विभागाने म्हटले आहे.

दरम्यान बंगालच्या उपसागरात आजपासून म्हणजेच ४ नोव्हेंबरपासून चक्रीवादळ घोंगावणार आहे. या चक्रीवादळामुळे हवामान खात्याने अंदमान आणि निकोबार बेटांसाठी 'सायक्लोन अलर्ट' जारी केला आहे. याचा परिणाम पुन्हा एकदा राज्याच्या हवामानावर होण्याची शक्यता वर्तवण्यात आली आहे. हवामानात होणार सततचा बदल पावसाला पोषक वातावरण निर्माण करत आहे. त्यामुळे पुढील काही तास राज्यासह इतर भागात महत्त्वाचे असल्याचं हवामान खात्याने म्हटलं आहे.