एक मोठी राजकीय बातमी समोर आली आहे. लोकसभेतल्या अपयशामुळे भाजप आता विधानसभा निवडणुका एकटा लढणार, अशी सूत्रांची माहिती आहे. आगामी निवडणूक स्वबळावर लढायची, याकडे भाजप नेतृत्वाचा कल राहू शकतो. अशीही माहिती सूत्रांनी दिलीय.

ज्या पक्षाच्या लोकांवर प्रचंड आरोप झाले, त्याच लोकांना सत्तेत सहभाग करण्याचा प्रयोग भाजपच्या मूळ मतदाराच्या पचनी पडला नाही, अशी भाजपअंतर्गत चर्चा आहे, अशीही माहिती मिळतेय. त्यामुळे विधानसभा निवडणुकीत भजापनं एकला चलोची भूमिका घेतली तर एकनाथ शिंदे आणि अजित पवारांना धक्का बसण्याची शक्यता आहे.

मंत्रिपद सोडण्याची फडणवीसांची तयारी

दरम्यान, लोकसभेच्या निवडणुकीत राज्यात भाजप आणि महायुतीला कमी जागा मिळाल्या. याची अनेक कारणं उपमुख्यमंत्री देवेंद्र फडणवीसांनी दिली. मात्र या अपयशाची जबाबदारी स्वीकारत फडणवीसांनी खुल्या पत्रकार परिषदेत मोठा राजकीय बॉम्ब टाकला.

फडणवीसांनी थेट उपमुख्यमंत्रिपद सोडण्याचीच तयारी दाखवली. पक्षसंघटनेत काम करण्याची इच्छ व्यक्त करत आगामी विधानसभा निवडणुकीचं रणशिंगच त्यांनी यातून फुंकलंय.

काय म्हणाले देवेंद्र फडणवीस?

देवेंद्र फडणवीस म्हणाले आहेत की, ''राज्यात लोकसभा निवडणुकीच्या प्रचारासाठी पक्षातील नेत्यांनी वरपासून ते खाली तळापर्यंत मेहनत घेतली. मात्र आम्हाला कमी मिळाल्या. जनतेने आम्हाला नाकारलं. राज्यात लोकसभा निवडणुकीचं नेतृत्व आपण करत होतो, त्यामुळे राज्यात आलेल्या पराभवाची जबाबदारी आपण स्वीकारत आहे. राज्यात कमी जागा मिळाल्यात त्यात मी कुठेतरी कमी पडलो असून, त्यामुळे मी पराभवाची जबाबदारी स्वीकारतो.''