समृद्धी महामार्गावरून भीषण अपघाताची घटना उघडकीस आली आहे. यवतमाळवरून शिर्डीला देवदर्शनासाठी जात असताना पीकअप मालवाहू वाहन आणि कारचा भीषण अपघात घडला. कारमधून भाविक देवदर्शनासाठी जात होते. मात्र, शिर्डीला पोहोचण्याआधीच वाशिमच्या कारंजा तालुक्यातील धनज पोलीस स्टेशन हद्दीत हा भीषण अपघात घडला. या अपघातात दोघांचा जागीच तर, दोन जण जखमी झाले आहेत. हा अपघात रात्री घडला असून, पोलिसांची चौकशी सुरू आहे.

प्राथमिक माहितीनुसार, वाशिमच्या कारंजा तालुक्यातील धनज पोलीस स्टेशन हद्दीत हा भीषण अपघात घडला असल्याची माहिती आहे. यवतमाळहून काही जण कारमधून प्रवास करत होते. ते शिर्डीच्या दिशेनं जात होते. मात्र, शिर्डीला पोहोचण्याआधीच त्यांच्या कारचा भीषण अपघात घडला.

समृद्धी महामार्गवर भरधाव पीकअप वाहनानं अचानक ब्रेक मारला. यामुळे भरधाव वेगात धावणारी कार अनियंत्रित होऊन या पिकअपवर धडकली. या अपघातात कार चालक मंगेश आणि विक्रम अशोकराव सौरगपते( वय ४०) रा. यवतमाळ यांचा जागीच मृत्यू झाला. तर अनुकूल मनोज यादव (वय ३५) रा.दत्त चौक यवतमाळ आणि मयूर दीपक डोनाडकर (वय २९ )रा.दत्त चौक यवतमाळ हे गंभीर जखमी झाले.

अपघात घडल्यानंतर स्थानिकांनी तातडीने घटनास्थळी धाव घेतली. तसेच जखमींना वाचवण्याचा प्रयत्न केला. स्थानिकांनी या अपघाताची माहिती पोलिसांना दिली. पोलिसांनी तातडीने घटनास्थळी धाव घेऊन मृत व्यक्तींना शवविच्छेदनासाठी रूग्णालयात पाठवले. सध्या जखमींवर कारंजा येथील उपजिल्हा रुग्णालयात दाखल करण्यात आले. दरम्यान, हा अपघात नेमका कसा घडला? याचा तपास पोलिसांकडून सुरू आहे.