Maharashtra Political News: काल विधीमंडळाच्या पावसाळी अधिवेशनात उपमुख्यमंत्री देवेंद्र फडणवीसांनी बारसू आंदोलनाबाबतचं निवेदन सादर केलं. यावेळी फडणवीसांनी बारसू येथील आंदोलनासाठी बंगळुरूतून फंडिंग झालं आहे, असे गंभीर आरोप आंदोलकांवर केले आहेत. त्यावरुन कोकणावर आणि कोकणी माणसावर एवढा राग कशासाठी? असा प्रश्न विचारत आदित्य ठाकरेंनी फडणवीसावर टीकास्त्र सोडलं आहे. (Latest Marathi News)

आपल्या ट्वीटर अकाउंटवर एक पोस्ट शेअर करत आदित्य ठाकरेंनी फडणवीसांसह मुख्यमंत्री एकनाथ शिंदेंवर देखील निशाणा साधला आहे. "नाणार असो की बारसू असो भाजपा महाराष्ट्रद्वेषी आहे हे वारंवार दिसतंच आणि त्याबरोबरच दिसतं ते शिंदेच्या सत्तेच्या लोभापायी कोकणी माणसाला दगा देणं, अशा शब्दांत आदित्य ठाकरेंनी शिंदेंवर निशाणा साधलाय.

आपल्या ट्वीटमध्ये आदित्य ठाकरेंनी पुढे लिहिलं आहे की, "कोकणावर आणि कोकणी माणसावर या लोकांचा एवढा राग कशासाठी? पाकिस्तानशी संबंध, बंदिस्त संघटना, परदेशी फंडिंग” अशा गोष्टी कोकणाशी जोडून हे महाराष्ट्रद्वेष्टे कोकणी माणसाला देशद्रोही का ठरवू पाहताहेत?"

"उद्या हे कोकणी माणसाला नक्षलवादी म्हणतील, त्यांच्यावर देशद्रोहाचे गुन्हे दाखल करतील. स्वतःचं खोटं रेटायला कोकणी माणसाचा बळी देतील. याचं कारण एकच- यांच्या महाराष्ट्र द्वेषा विरुद्ध उभ्या राहणाऱ्या कोकणी माणसावरचा राग, अशा शब्दांत आदित्य ठाकरेंनी उपमुख्यमंत्री आणि मुख्यमंत्र्यांवर हल्लाबोल केला आहे.