विकास मिरगणे, नवी मुंबई

रायगड जिल्ह्यातील खालापूर परिसरातील प्रसिद्ध इमॅजिका वॉटर पार्कमध्ये फिरण्यासाठी आलेल्या ४७ वर्षीय पर्यटकाचा अचानक मृत्यू झाल्याची दुर्दैवी घटना घडली आहे. या घटनेमुळे पार्क परिसरात काही काळ हळहळ व्यक्त करण्यात आली असून पर्यटकांमध्येही चिंतेचे वातावरण निर्माण झाले होते.

मिळालेल्या माहितीनुसार, कपिल शांताराम पाटील हे आपल्या कुटुंबीयांसह आणि मित्रपरिवारासोबत पर्यटनाचा आनंद घेण्यासाठी इमॅजिका वॉटर पार्कमध्ये आले होते. दिवसभर वेगवेगळ्या ॲक्टिव्हिटी करताना अचानक त्यांना अस्वस्थ वाटू लागले. त्यानंतर त्यांना चक्कर आली आणि ते पार्क परिसरातच कोसळले. घटना घडताच पार्क कर्मचाऱ्यांनी तत्काळ धाव घेतली.

कपिल पाटील यांना तातडीने वैद्यकीय मदत देण्याचा प्रयत्न करण्यात आला. तसेच त्यांना जवळच्या रुग्णालयात हलवण्याची तयारी करण्यात आली. मात्र वैद्यकीय तपासणीनंतर त्यांचा मृत्यू झाल्याचे स्पष्ट झाले. घटनेची माहिती मिळताच स्थानिक पोलिसांनी घटनास्थळी भेट देत पंचनामा केला. त्यानंतर मृतदेह पुढील तपासणी आणि शवविच्छेदनासाठी खालापूर ग्रामीण रुग्णालयात पाठवण्यात आला आहे.

प्राथमिक वैद्यकीय माहितीनुसार कपिल पाटील यांचा मृत्यू हृदयविकाराच्या तीव्र झटक्यामुळे झाल्याचा अंदाज व्यक्त करण्यात येत आहे. अचानक घडलेल्या या घटनेमुळे पाटील कुटुंबीयांवर दुःखाचा डोंगर कोसळला आहे. नातेवाईक आणि मित्रपरिवाराकडून हळहळ व्यक्त करण्यात येत आहे.